कुशीनगर एक्स्प्रेसमध्ये बनावट तिकीट तपासनीस

बनावट तिकीट तपासनिसाला अटक
कल्याण, ता. २२ (बातमीदार) : लोकमान्य टिळक टर्मिनसहून सुटलेल्या कुशीनगर एक्स्प्रेसमध्ये तिकीट तपासनीस असल्याचे भासवून रेल्वे प्रवाशांचे तिकीट तपासणाऱ्याला अटक करण्यात आली आहे. ही गोष्ट साध्या वेशात याच एक्स्प्रेसमध्ये प्रवाशांची तिकिटे तपासणाऱ्या मध्य रेल्वेच्या दुसऱ्या एका तिकीट तपासनिसाला आढळली. या वेळी इतर तिकीट तपासनिसांकडेही याबद्दल विचारणा केल्यावर हा व्यक्ती तोतया असल्याचे आढळून आहे. रेल्वे सुरक्षा बलाच्या जवानांनी त्याला तत्काळ ताब्यात घेत गुन्हा दाखल केला. रामप्रकाश रामजीवन मंडल (४०) असे अटक केलेल्या बनावट तिकीट तपासनिसाचे नाव आहे. तो विरार येथील बोळिंज भागातील टेलिकाॅम एक्स्चेंजजवळील मंडल इमारतीत राहतो. मध्य रेल्वेचे मुख्य तिकीट तपासनीस हरेश किसन दहिलकर (५३) यांनी या वेळी या बनावट तिकीट तपासनिसाविरुद्ध कल्याण लोहमार्ग पोलिस ठाण्यात तक्रार केली. पोलिसांनी गुन्हा दाखल करून त्यांना अटक केली आहे.