सप्तशृंगी इमारत दुर्घटनेतील बाधिताची पुनर्वसनाची मागणी

पुनर्वसनासाठी पालिका आयुक्तांना साकडे
कल्याण, ता. २४ (वार्ताहर) : सप्तशृंगी इमारत दुर्घटनेत सहा जणांचा मृत्यू झाला, तर अनेक जण जखमी झाले होते. दुर्घटना घडलेल्या इमारतीतील रहिवाशांच्या मदतकार्यासाठी पालिका प्रशासनाने इमारत रिकामी केली, तसेच रहिवाशांची तात्पुरती राहण्यासाठी व्यवस्था शाळेमध्ये केली आहे. याच इमारत दुर्घटनाग्रस्त रहिवाशांनी पुनर्वसनाच्या मागणीसाठी कल्याण-डोंबिवली आयुक्तांची शुक्रवारी (ता. २३) दुपारी भेट घेतली. तसेच त्यांची व्यथा आयुक्तांसमोर मांडली.
भाजप आमदार सुलभा गायकवाड, शिंदे गटाचे शिवसेना शहरप्रमुख नीलेश शिंदे हेदेखील रहिवासी शिष्टमंडळासबोत होते. इमारत खासगी मालमत्ता आहे. तसेच यासंदर्भात पुनर्वसन धोरण नसल्याने पुनर्वसन होऊ शकत नाही; मात्र इमारत रिडेव्हलपमेंटसाठी प्रस्ताव पालिकेकडे आल्यास पालिका प्रशासन मदत करेल, असे आश्वासन त्यांनी शिष्टमंडळाला दिले. दुर्घटनाग्रस्त इमारत रहिवासी शिष्टमंडळात रेखा पाठारे, सुधीर लांवडे आदिसह इमारतीतील रहिवासी होते.