खोदलेल्या रस्त्यावरच टाकला लग्नाचा मंडप

खोदलेल्या रस्त्यावरच टाकला लग्नाचा मंडप
सकाळ वृत्तसेवा
डोंबिवली, ता. २४ : डोंबिवलीकर कधी काय करतील याचा नेम नाही. शहरात रस्त्यांची सिमेंट काँक्रीटीकरणाची काम सुरू आहेत. यामुळे अनेक ठिकाणी रस्ते खोदले आहेत. या खोदलेल्या रस्त्याचाच फायदा घेत त्या खोदकामाच्या ठिकाणी मंडप टाकून तेथे लग्नसमारंभाचे कार्यक्रम तसेच इतर खासगी कार्यक्रम केले जात आहेत. हे कार्यक्रम पाहता डोंबिवलीकरांचा विषय हार्ड अशीच प्रतिक्रीया उमटत आहे. या कार्यक्रमांसाठी काही ठिकाणी कामदेखील त्या दिवसांसाठी बंद ठेवण्यात येत आहेत. पालिकेकडूनदेखील कार्यक्रम व आयोजकांना अभय दिले जात आहे.

डोंबिवलीत रस्त्यांची सिमेंट कॉंक्रीटीकरणाची कामे सुरू आहेत. याबरोबरच रस्त्यांच्या कडेला गटारांची बांधणी, महानगर पाइपलाइन, अमृत योजनेतील जलवाहिन्या टाकण्याची कामे सुरू आहेत. या कामांसाठी जागोजागी रस्ते खोदलेले आहेत. ही कामे अत्यंत संथ गतीने सुरू आहेत. मे महिना हा लग्नसराईचा महिना आहे. या रस्त्यांच्या कामामुळे लगीन घरातील मंडळींना अनेक अडचणींचा सामना करावा लागतो; मात्र काही लगीन घरातील मंडळींनी वेगळीच शक्कल लढवल्याचे डोंबिवली पश्चिमेला दिसून येत आहे. नवापाडा रस्त्याखालील जलवाहिनी टाकण्याचे काम केल्यानंतर या रस्त्याचे आता सिमेंट कॉंक्रीटीकरणाचे काम हाती घेण्यात आले आहे. एका टप्प्यातील काम केले असून, पुढील टप्प्यातील काम हाती घेण्यासाठी तो रस्ता खोदला आहे.

रस्ता खोदण्यात आल्यानंतरदेखील येथे मंडप टाकून त्या खोदलेल्या रस्त्यावर लग्न समारंभाचे कार्यक्रम पार पडत आहेत. तीन ते चार दिवसांपासून येथे मंडप टाकण्यात आला आहे. सुरुवातीला खोदलेल्या रस्त्याच्या कडेला मंडप सजावट केली जात आहे. ही सजावट पाहून अनेकांच्या भुवयादेखील उंचावत होत्या, मात्र त्यानंतर येथे लग्न समारंभाचे कार्यक्रम सुरू झाल्यावर नागरिकदेखील आश्चर्य व्यक्त करत आहेत. डोंबिवलीकरांचा विषय हार्ड असे म्हणत जो तो या रस्त्यावर सुरू असलेल्या या कार्यक्रमांची छबी आपल्या कॅमेऱ्यात कैद करत आहेत.

पालिका प्रशासनाचे दुर्लक्ष
डोंबिवली पश्चिमेला अनेकदा रस्त्यावरच मंडप टाकून रस्ता बंद करून खासगी कार्यक्रम केले जात आहेत. यासाठी पालिकेची कोणतीही परवानगी घेण्यात येत नाही, की तेथील रहिवाशांना, वाहनचालकांना याची कल्पना देण्यात येत नाही. त्यामुळे नागरिकांना नाहक त्रास सहन करत वळसा मारून प्रवास करावा लागतो. या सगळ्या प्रकारांकडे पालिका - पोलिस प्रशासनाचे लक्ष नाही. यामुळे रस्त्यावर बिनधास्त करा कार्यक्रम, पालिकेकडून मिळेल अभय, असे मत जाणकार व्यक्त करत आहेत.