प्रत्येक रुग्णालयात पाच खाटा राखीव

वाशी, ता. २४ (बातमीदार) ः राज्यातील काही भागांत सध्या कोविड रुग्ण आढळून येत आहेत. त्या अनुषंगाने नवी मुंबई महापालिका सज्ज झाली आहे. आयुक्त डॉ. कैलास शिंदे यांच्या आदेशानुसार महापालिकेच्या वाशी, नेरूळ, ऐरोली येथील सार्वजनिक रुग्णालयांमध्ये प्रत्येकी पाच खाटा राखीव ठेवण्यात आल्या आहेत. नेरूळ येथील माँसाहेब मीनाताई ठाकरे सार्वजनिक रुग्णालयात चाचणी लॅबदेखील उपलब्ध आहे.
खासगी वैद्यकीय व्यावसायिकांनाही कोरोनाबाबत सतर्क राहण्याच्या व कोविडसदृश लक्षणे आढळल्यास महापालिकेस सूचित करण्याच्या सूचना देण्यात आल्या आहेत. केंद्र व राज्य सरकारमार्फत याबाबत वेळोवेळी प्राप्त होणाऱ्या सूचनांची अंमलबजावणी प्रभावीपणे करण्यात येत आहे. त्या अनुषंगाने काळजी म्हणून ताप, सर्दी, खोकल्याचे रुग्ण आढळून आल्यास खबरदारीचा एक भाग म्हणून नागरिकांनी श्वसनाच्या संसर्गापासून बचाव करण्यासाठी काही बाबींचे पालन करणे गरजेचे आहे.
-------------
काळजी घेण्याचे आवाहन
खोकला किंवा शिंक येत असेल तेव्हा आपले तोंड आणि नाक रुमाल किंवा टिश्यू पेपरने झाकावे. साबण आणि पाणी किंवा अल्कोहोल आधारित सॅनिटायझरने आपले हात वारंवार धुवावेत. ताप, खोकला आणि शिंका येत असल्यास सार्वजनिक ठिकाणांपासून दूर राहावे. भरपूर पाणी प्यावे आणि पौष्टिक अन्न खावे. संक्रमण कमी करण्यासाठी सर्व ठिकाणी पुरेसे वायुविजन (व्हेंटिलेशन) होईल याची दक्षता घ्यावी. हस्तांदोलन टाळावे, टिश्यू पेपर आणि रुमालाचा पुनर्वापर करू नये. आजारी लोकांशी जवळचा संपर्क टाळावा. डोळे, नाक आणि तोंडाला वारंवार स्पर्श करू नये. सार्वजनिक ठिकाणी थुंकू नये. डॉक्टरांच्या सल्ल्याशिवाय औषध (सेल्फ मेडिकेशन) घेऊ नये.
-------------
नवी मुंबईकर नागरिकांनी कोविडबाबत घाबरून न जाता आवश्यक काळजी घेणे गरजेचे आहे. महापालिकेच्या वतीने आवश्यक दक्षता घेण्यात आली असून, नागरिकांनी अफवांवर विश्वास न ठेवता नाहक भीतीचे वातावरण पसरवू नये. लक्षणे आढळल्यास वैद्यकीय सल्ला घ्यावा आणि महापालिकेच्या नागरी प्राथमिक आरोग्य केंद्रात अथवा रुग्णालयात जाऊन उपचार घ्यावेत.
- डॉ. कैलास शिंदे, आयुक्त