कल्याण ते शिळ रस्त्यावरील नालेसफाई रखडली

कल्याण ते शिळ रस्त्यावरील नालेसफाई रखडली
कल्याण, ता. २४ (बातमीदार) : कल्याण-शिळ रस्त्यावरील नाल्यात प्लॅस्टिक पिशव्यांचा कचरा साचला असून, येथील नालेसफाई केव्हा पूर्ण होणार, असा सवाल स्थानिक नागरिक उपस्थित करत आहेत. त्यामुळे पावसाळ्यात पाणी साचून शिळ रस्त्यावर मोठी वाहतूक कोंडी होण्याची भीती व्यक्त होत आहे.

कल्याण-डोंबिवली महापालिकेने नालेसफाईला काही दिवसांपासून सुरुवात केली असून, सध्या पहिल्या टप्प्यातील नालेसफाई सुरू आहे. येत्या ३१ मेपर्यंत ही नालेसफाई पूर्ण करणार असल्याचे मलनिस्सारण विभागाच्या कार्यकारी अभियंत्यांनी यापूर्वीच स्पष्ट केले आहे. या पार्श्वभूमीवर अनेक ठिकाणी नालेसफाईची कामे सुरू असली तरी काही महत्त्वाच्या ठिकाणी अद्याप नालेसफाई झालेली नाही. यात कल्याण ते शिळ रस्त्यावरील नाल्याचा समावेश आहे. या नाल्यात कचरा, प्लॅस्टिकच्या पिशव्यांमुळे सांडपाणी तुंबल्याचे दिसते आहे.

नागरिक भयभीत
कल्याण-शिळ रस्ता हा अत्यंत वाहतुकीचा आणि रहदारीचा रस्ता आहे. या रस्त्यावर अनेकदा वाहनांच्या रस्त्याच्या दुतर्फा गाड्या लागलेल्या असतात. त्यातच एकीकडे कल्याण-शिळ रस्त्यावर सुरू असलेल्या मेट्रोच्या कामाने वाहतूक कोंडी वाढत आहे, तर दुसरीकडे येथील नाल्याची सफाई पूर्ण झालेली नाही. त्यामुळे नाल्यातील पाण्याचा प्रवाह बंद झाल्यास नाल्याचे पाणी यंदा कल्याण-शिळ रस्त्यावरून वाहण्याची भीती व्यक्त होत आहे. ही नालेसफाई पावसाळा सुरू होण्यापूर्वीच केली जावी, अशी मागणी आता स्थानिकांकडून होत आहे.

दुर्गंधी पसरण्याची भीती
महापालिका प्रशासनाकडून अद्याप कल्याण-शिळ रस्त्यावरील गटारांची सफाई केलेली नाही, असे स्थानिकांचे म्हणणे आहे. मुसळधार पावसाच्या आधी जर प्रशासनाने गटारे स्वच्छ केले नाहीत, तर कल्याण-शिळ रस्त्यावरील नाल्याच्या पाण्याचा प्रवाह थांबू शकतो. तसेच पावसाळ्यात कल्याण-शिळ रस्त्यावरून वाहनांसोबत गटारातील दूषित पाणीसुद्धा या काळात वाहून दुर्गंधी पसरू शकते.

आयुक्तांची तंबी
कल्याण-डोंबिवली महापालिका आयुक्तांनी नालेसफाई करणाऱ्या ठेकेदारांना काही दिवसांपूर्वी तंबी दिली होती. नालेसफाई वेळेत पूर्ण न झाल्यास ठेकेदारांना काळ्या यादीत टाकणार असल्याचेही आयुक्त अभिनव गोयल यांनी स्पष्ट केले होते. यासाठी काही ठेकेदारांना नोटिसाही बजावण्यात आल्या आहेत, मात्र तरीही काही ठेकेदार नालेसफाईच्या कामात कुचराई करत असल्याची महापालिका वर्तुळात चर्चा आहे. त्यामुळे आयुक्तांच्या तंबीला ठेकेदारांनी पाने पुसल्याचे म्हटले जात आहे, मात्र पर्यायाने नालेसफाई न झाल्यास येत्या पावसाळ्यात कल्याण व डोंबिवलीत अनेक ठिकाणी पूरस्थिती होण्याची शक्यता व्यक्त होत आहे.