कामगारांच्या प्रलंबित मागण्यासाठी उद्यापासून उपोषण

उरण, ता. २४ (वार्ताहर) : राज्यातील नगर परिषदा आणि नगरपंचायत कर्मचाऱ्यांच्या अनेक मागण्या प्रदीर्घ काळापासून प्रलंबित आहेत. या मागण्यांवर तत्कालीन मुख्यमंत्री एकनाथ शिंदे यांनी २० मार्च २०२३मध्ये विविध अधिकाऱ्यांच्या उपस्थितीत सकारात्मक निर्णय घेतले होते; परंतु दोन वर्षे होऊनही या सकारात्मक निर्णयांची अंमलबजावणी झाली नाही. त्यामुळे सरकारचे लक्ष वेधण्यासाठी सोमवारी (ता. २६) आझाद मैदानात बेमुदत उपोषण करण्यात येणार आहे. प्रदीर्घ काळापासून प्रलंबित मागण्यांकडे राज्य सरकारचे लक्ष वेधण्यासाठी आणि प्रलंबित प्रश्न सोडवून घेण्यासाठी कर्मचाऱ्यांनी उपोषणाचे हत्‍यार उपसले आहे. नगरविकास विभाग आणि वित्त विभागातील अधिकारी, कर्मचाऱ्यांच्या नकारात्मक भूमिकेमुळे कर्मचारी, निवृत्त कर्मचाऱ्यांचे मोठ्या प्रमाणात आर्थिक नुकसान होत आहे. त्यामुळे राज्य सरकारचे लक्ष वेधण्यासाठी महाराष्ट्र राज्य नगर परिषद, नगरपंचायत कर्मचारी संघर्ष समितीचे सर्व पदाधिकारी मुंबई येथील आझाद मैदानात सोमवारपासून बेमुदत उपोषण करणार आहेत.