पावसाळ्यापूर्वी नालेसफाई पूर्ण करा

पनवेल, ता. २४ (बातमीदार) : यंदा सरासरीपेक्षा जास्त पावसाची शक्यता हवामान विभागाने वर्तवली आहे. या पार्श्वभूमीवर पनवेल महापालिका कार्यक्षेत्रातील चारही प्रभागांतील विविध नाल्यांच्या सफाईची पाहणी करून कामकाजाचा आढावा आयुक्त मंगेश चितळे यांनी घेतला. मॉन्सूनपूर्व लवकरात लवकर सर्व नाल्यांची सफाई करण्याच्या सूचना आयुक्तांनी संबंधित उपायुक्त व अधिकारी, कर्मचाऱ्यांना दिल्या.
महापालिकेच्या ११० किलोमीटर क्षेत्रात १०१ मोठे आणि २,१०४ लहान नाले आहेत. यापैकी ६८ नाल्यांची सफाई पूर्ण झाली आहे. २,१०४ लहान नाल्यांपैकी एक हजार २६२ नाल्यांची सफाई पूर्ण झालेली आहे. यावर्षी मॉन्सूनपूर्व पाऊस लवकर आल्याने नालेसफाईची सर्व कामे वेगाने पूर्ण होण्याच्या दृष्टीने आयुक्तांनी संबंधित अधिकाऱ्यांना सूचना दिल्या आहेत. पाहणी दौऱ्यात खारघरमधील सेक्टर १२, महापौर बंगल्याजवळील नाले, उत्सव चौक, कळंबोली पंपहाउस, कळंबोली चर्चजवळील नाला अशा सर्व नाल्यांची पाहणी आयुक्तांनी केली. या वेळी स्वच्छता व घनकचरा विभागाचे उपायुक्त डॉ. वैभव विधाते, शहर अभियंता संजय कटेकर, सहाय्यक आयुक्त श्रीराम पवार, स्वच्छता विभाग प्रमुख अनिल कोकरे, प्रभाग अधिकारी जितेंद्र मढवी व कर्मचारी उपस्थित होते.
--------------------
यांत्रिक पद्धतीने नालेसफाई
आरोग्य विभागाचे उपायुक्त डॉ. वैभव विधाते यांनी नालेसफाईचे सूक्ष्म नियोजन केले आहे. महापालिकेच्या आरोग्य विभागाकडून यांत्रिक पद्धतीने चारही प्रभागातील नालेसफाईचे काम अंतिम टप्प्यात आले असून, नालेसफाईबरोबरच शहरातील लहान-मोठ्या गटारीच्या साफसफाईचे कामही जोमाने सुरू आहे. नालेसफाईच्या कामासाठी सरासरी ७०० मनुष्यबळ, १५ जेसीबी, १५ पोकलेन, १७ डम्पर वापरण्यात येत आहेत. नालेसफाई कामामध्ये काढण्यात आलेल्या गाळामध्ये मोठ्या प्रमाणात माती असल्याने ती पनवेल महापालिका हद्दीतच मोकळ्या भूखंडावर पसरण्यात येत आहे.
----------------------
कळंबोली शहरात पालिकेचे विशेष लक्ष असून, आपत्कालीन परिस्थितीसाठी यंत्रणा सज्ज ठेवण्याबाबत सूचना दिल्या आहेत. पालिका क्षेत्रातील नालेसफाईची पाहणी केली आहे. नाल्यातील काढलेल्या गाळाची योग्यरित्या विल्हेवाट लावणे गरजेचे आहे. उर्वरित नालेसफाईची कामे वेगाने करण्याच्या सूचना संबंधित विभागास दिल्या आहेत.
- मंगेश चितळे, आयुक्त, पनवेल महापालिका