घणसोली ग्रामस्थ सिडकोसह पालिके विरोधात आक्रमक

घणसोली ग्रामस्थ सिडकोसह पालिकेविरोधात आक्रमक
तुर्भे, ता. २४ (बातमीदार) ः नवी मुंबई महापालिकेकडून मिळकतींवर तिप्पट कर आकारण्यात आल्याने नाराजी व्‍यक्‍त केली जात आहे. त्‍याअनुषंगाने घणसोली ग्रामस्थांकडून बैठक घेत लवकरच सिडको व पालिकेच्या विरोधात आंदोलन केले जाणार असल्याचा इशारा श्री देवस्थान संस्था घणसोली आणि ग्रामस्थ यांच्या वतीने देण्यात आला आहे.
नवी मुंबई महापालिकेने लागू केलेल्या कराविरोधात घणसोली ग्रामस्‍थ आक्रमक झाले आहेत. यासाठी ग्रामस्‍थांकडून बैठकीचे आयोजन करण्यात आले होते. या वेळी ग्रामस्‍थांनी गरजेपोटी उभारलेल्या बांधकामांबाबत अद्याप कोणताही शासकीय निर्णय झालेला नाही. तसेच प्रकल्पग्रस्तांनी धारण केलेल्या बांधकाम क्षेत्र जागेची शुल्क भरण्याची पूर्तता होत नाही तोपर्यंत घणसोली गावातील गावठाणालगतच्या क्षेत्रातील गरजेपोटी बांधकामांवर वाढीव मालमत्ता कर न आकारता तोडक कारवाई करू नये, असा ठराव या बैठकीत करण्यात आला आहे. नवी मुंबईतील ९५ गावांतील ग्रामस्थांच्या शेतजमिनीचे महाराष्ट्र शासनामार्फत सिडको महामंडळाने भूमी अधिग्रहण केले. त्या बदल्यात संघर्षमय आंदोलनातून साडेबारा टक्के योजना भूमिपुत्रांसाठी लागू झाली. या योजनेअंतर्गत ३० टक्के जमीन सामाजिक सुख-सुविधाकरिता आरक्षित केली. ती आजतागायत घणसोली ग्रामस्थांना मिळालेली नाही. १०० टक्के भूमिहीन झालेल्या घणसोली ग्रामस्थांनी गावठाणालगतच्या क्षेत्रात जे बांधकाम केले आहे, त्या जागेचे भूखंडही सिडको प्राधिकरणाने कपात केले आहेत.