फ्लोडाईन क्रूझवरील अपघातात ८ वर्षांची मुलगी जखमी

फ्लोडाईन क्रूझवरील अपघातात आठ वर्षांची मुलगी जखमी
नवी मुंबई, ता. २४ (वार्ताहर) : आई-वडिलांसह लग्नाच्या वाढदिवसानिमित्त बेलापूर मरीना जेट्टी येथून निघाणाऱ्या फ्लोडाईन क्रूझ बोटीवर गेलेल्या आठवर्षीय सान्वी पाटील हिला बोटीतील काच फुटून लागल्याने ती जखमी झाल्याची घटना मंगळवारी (ता. २०) घडली. या घटनेनंतर जखमी मुलीच्या वडिलांनी एनआरआय पोलिस ठाण्यात फेरी ऑपरेटरविरोधात निष्काळजीबाबत तक्रार दाखल केली आहे. त्यानुसार पोलिसांनी शुक्रवारी (ता. २३) गुन्हा दाखल करून पुढील तपासाला सुरुवात केली आहे.
प्रवीण पाटील (वय ४१) लग्नवाढदिवस साजरा करण्यासाठी पत्नी व मुलगी सान्वीसह बेलापूर मरीना जेट्टी येथून निघणाऱ्या फ्लोडाईन क्रूझ बोटीवर गेले होते. केक कापल्यानंतर तन्वी हात धुण्यासाठी वॉश बेसिनकडे गेली असताना तेथील काचेचा दरवाजा फुटून तिला गंभीर स्वरूपाच्या दुखापती झाल्याचे प्रवीण पाटील यांचे म्हणणे आहे. तर बोटीचे मालक राजेश नायर यांनी ही घटना अपघात असून, त्यासाठी कुटुंबच जबाबदार असल्याचे म्हटले आहे.