शिरवणे शाळेच्या चौकात पोलिस चौकी उभारा

नेरूळ, ता. २५ (बातमीदार) : नुकताच नेरूळ सेक्टर ४ मध्ये एका महिलेच्या मंगळसूत्र चोरीची घटना घडली. सेक्टर ४ येथून पायी चालत जात असताना दुचाकीवरून आलेल्या एकाने महिलेच्या गळ्यातील मंगळसूत्र खेचून पळ काढला. सेक्टर ४ परिसर कमी रहदारीचा मानला जातो. ही परिस्थिती ओळखत दबा धरून बसलेल्या चोरांनी महिलेच्या गळ्यातील चेन चोरली गेल्याचे नागरिकांनी सांगितले. त्यामुळे सेक्टर ४ व २ परिसरातील नागरिकांच्या सुरक्षेसाठी येथे पोलिस चौकी उभारावी, अशी मागणी भाजप महिला मोर्चाच्या सुहासिनी नायडू यांनी केली आहे.
नेरूळ सेक्टर ४ परिसर शांतताप्रिय मानला जातो. काही दिवसांपूर्वी या ठिकाणी एका व्यक्तीची हत्या झाल्याची घटना घडली होती. तसेच सेक्टर ४च्या बाजूला कांदळवन भाग आहे; तर दुसऱ्या बाजूस विविध धर्मांच्या स्मशानभूमी आहेत. येथे विस्तीर्ण कांदळवनाचा भाग असल्याने हे रस्ते निर्मनुष्य असतात. या निर्मनुष्य रस्त्यांचा आधार घेत या भागात अनेक अनैतिक गोष्टी होत असतात. प्रेमीयुगल अश्लील चाळे करताना आढळतात. गर्दुल्ल्यांचा वावर असतो. त्यामुळे नागरिकांमध्ये कायम भीतीचे वातावरण असते. येथे शिरवणे विद्यालय व नवी मुंबई महापालिकेची शाळादेखील आहे. त्यामुळे महिला व मुलींच्या सुरक्षिततेच्या दृष्टीने शिरवणे विद्यालय चौकात पोलिस बीटची आवश्यकता आहे. पोलिस बीट उभारल्यास या परिसरातील नागरिकांना दिलासा मिळेल, असे नायडू यांनी निवेदनात म्हटले आहे.