एमएमआरडीएला वृक्षतोडीसाठी शुल्कसवलत

एमएमआरडीएला वृक्षतोडीसाठी शुल्क सवलत
मिरा-भाईंदर महापालिकेकडून कपात
भाईंदर, ता. २६ (बातमीदार) : मिरा-भाईंदर मेट्रोसाठी डोंगरी गावात कारशेड उभारण्यात येणार आहे. त्यासाठी सुमारे दीड हजार वृक्ष तोडण्याची परवानगी महापालिकेने एमएमारडीएला दिली आहे. याबदल्यात सुरुवातीला तब्बल २० कोटी रुपये शुल्क भरण्यास एमएमआरडीएला भरण्यास महापालिकेकडून सांगण्यात आले होते; मात्र हे शुल्क जास्त असून, ते कमी करण्याची मागणी एमएमआरडीएने केल्यानंतर महापालिकेने हे शुल्क कमी करून आता केवळ साडेसात कोटी रुपयांवर आणले आहे.

कारशेडसाठी एमएमआरडीएने मिरा भाईंदर महापालिकेकडे दोन टप्प्यात वृक्षतोड करण्यासाठी परवानगी मागितली. पहिल्या टप्प्यातील १४०६ झाडे काढण्याची व पुनर्रोपण करण्याची परवानगी देताना महापालिकेने २० कोटी ७३ लाख रुपयांचे शुल्क भरण्यास एमएमारडीएला सांगितले. १४०६ वृक्षांपैकी ८३२ झाडे मुळासहित काढली जाणार आहेत, तर ५७४ झाडांचे पुनर्रोपण केले जाणार आहे. मुळासहित काढण्यात येणाऱ्या झाडांच्या बदल्यात ८२९२ झाडे लावण्यात येणार आहेत. त्यासाठी प्रतीझाड २५ हजार रुपये याप्रमाणे २० कोटी ७३ लाख रुपये महापालिकेकडून आकारण्यात आले, परंतु महापालिकेने आकारलेल्या शुल्कावर एमएमआरडीएकडून नाराजी व्यक्त करण्यात आली होती. २५ हजार प्रती झाड हे शुल्क खूपच जास्त आहे. एमएमआरडीए ठाणे व कल्याण डोंबिवली परिसरातही प्रकल्प राबवत असून, त्यांचे दर अत्यंत वाजवी व रास्त आहेत. त्यामुळे हे दर कमी करण्यात यावेत, असे पत्र एमएमआरडीएने मिरा-भाईंदर महापालिकेला देण्यात आले.

आयुक्त राधाबिनोद शर्मा यांनी हे दर कमी करण्यास नुकतीच मान्यता दिली आहे. त्यानुसार ८,२९२ नवीन लागवड करण्यात येत असलेल्या झाडांच्या शुल्कात महापालिकेने मोठी कपात केली आहे. त्यामुळे या लागवडीसाठी आता एमएमआरडीएला सहा कोटी ७१ लाख रुपये तसेच वृक्षतोड व पूनर्रोपणासाठी चार लाख २१ हजार असे सात कोटी ४९ लाख रुपयांचे शुल्क आकारण्याचा निर्णय प्रशासनाने घेतला आहे.

दुसऱ्या टप्प्यात ९९०० झाडांची तोड
दुसऱ्या टप्प्यात एमएमआरडीएकडून ९९०० झाडांची तोड तसेच पुनर्रोपण केले जाणार आहे, मात्र त्याला स्थानिक नागरिकांनी तीव्र विरोध केला असून, महापालिकेने त्यावर सुनावणी घेतली आहे. या सुनावणीनंतर एमएमआरडीएला वृक्षतोडीची परवानगी देण्याबाबत अद्याप कोणताही निर्णय महापालिकेने घेतलेला नाही.