पावसामुळे ठाणेकरांचे हाल

पावसामुळे ठाणेकरांचे हाल
लोकल रद्द झाल्याने स्थानकात गर्दी
सकाळ वृत्तसेवा
ठाणे, ता. २६ : रविवारी (ता. २५) रात्री साडेअकरापासून शहरात पावसाला सुरुवात झाली. सोमवारी (ता. २६) सकाळी साडेआठ वाजेपर्यंत ९.१० मिमी पाऊस नोंदवला गेला. सकाळी साडेनऊ वाजल्यापासून दुपारी साडेचार वाजेपर्यंत ०९.६२ मिमी पाऊस झाला. दुसरीकडे ठाणे रेल्वे स्थानकावरील १ आणि ६ नंबर फलाटावरील लोकल रद्द झाल्याने नागरिकांची फलाट नंबर ४वर गर्दी झाली होती. शिवाय लोकल आल्यावर चढण्यासाठी नागरिकांची चढाओढ दिसून आली. कामानिमित्ताने घराबाहेर पडलेल्या नागरिकांचे हाल झाले. ठाणे शहरात लोकल रद्द झाल्याने कामावर जाण्यासाठी नोकरदार वर्गाने ठाणे रेल्वे स्थानकाबाहेरील सॅटिस पुलाखाली रिक्षा स्टॅण्ड आणि स्टेशन परिसरातील एसटी बस थांब्यावर धाव घेतली. त्यामुळे त्या ठिकाणी मोठी गर्दी झाल्याचे चित्र दिसून आले. दरम्यान, हाल झालेल्या नागरिकांची रिक्षावाल्यांकडून लूट होऊ नये म्हणून वाहतूक पोलिस रिक्षा स्टॅण्डजवळ तैनात असल्याचे दिसून आले.

ठाणे शहरामधील मुंब्रा आणि टिकुजिनिवाडी अशा दोन ठिकाणी झाडे उन्मळून पडली असून, कासारवडवली आणि दादोजी कोंडदेव क्रीडांगण परिसरात झाडाची फांदी तुटून पडल्याची आपत्ती व्यवस्थापन विभागाने दिली.

आठ दिवसांत १३३ मिमी पावसाची नोंद
ठाण्यात यंदा मे महिन्यात पावसाने हजेरी लावली. ६ मे रोजी हजेरी लावणाऱ्या पावसाने त्यानंतर ७, १९, २०,२१, २४,२५ आणि २६ मे रोजी हजेरी लावली. त्यानुसारच आतापर्यंत ठाणे शहरात एकूण १३३ मिमी अवकाळी पावसाची नोंद झाल्याची माहिती आपत्ती व्यवस्थापन विभागाने दिली.