नवजात बालकाची विल्‍हेवाट लावताना बेड्या

नवजात बालकाची विल्‍हेवाट लावताना बेड्या
घाटकोपर, ता. २७ (बातमीदार) ः अनैतिक संबंध ठेवताना माणूस नातीगोती बघत नाही. असाच प्रकार भांडुप भागात घडला आहे. सख्ख्या मावशीबरोबर असलेल्या अनैतिक संबंधातून जन्माला आलेल्या बाळाची विल्हेवाट लावण्यासाठी निघालेल्या एका २८ वर्षीय तरुणाला पोलिसांनी अटक केली आहे. भांडुप येथे हा धक्कादायक प्रकार समोर आला आहे. पोलिसांनी त्याला ताब्यात घेतल्यानंतर त्याने ही माहिती दिली. या तरुणाने घरातच मावशीची प्रसूती केल्याचे उघड झाले आहे. लोकांना याबाबत कळू नये, यासाठी त्याने या नवजात बालकाची विल्हेवाट लावण्याचे ठरवले. तो रिक्षातून अर्भकाला घेऊन जात असताना विक्रोळी गांधीनगर येथे ड्युटीवर असलेले पोलिस अंमलदार सतीश ससाणे यांना संशय आला. त्यांनी त्या रिक्षाची तपासणी केली असता एका कापडात हे नवजात भ्रूण गुंडाळून नेत असल्याचे त्यांच्या निदर्शनास आले. त्यांनी तरुणाला अटक केली. पार्कसाईट पोलिस ठाण्यात घेऊन आले आणि अधिक माहिती घेतली. हे नवजात बाळ व त्याच्या आईला उपचारार्थ राजावाडी रुग्णालयात दाखल करण्यात आले आहे. त्यांची प्रकृती आता स्थिर असल्याची माहिती पार्कसाईट पोलिस ठाण्याचे पोलिस निरीक्षक (गुन्हे) प्रमोद सानप यांनी दिली.