भिवंडीकरांचा एसटी प्रवास सुसह्य

भिवंडी, ता. २७ (वार्ताहर)ः शहरातील बसस्थानक धोकादायक झाले आहे. या स्थानकाची दुरुस्ती महाराष्ट्र राज्य मार्ग परिवहन महामंडळाने सार्वजनिक खासगी भागीदार (पीपीपी) तत्त्वावर करण्यासाठीची निविदा प्रक्रिया प्रसिद्ध केल्याने भिवंडीकरांचा एसटी प्रवास सुसह्य होणार आहे.
भिवंडीतील बसस्थानक खासगी सहभागातून विकसित केला जाणार आहे. त्यानुसार बसस्थानकाच्या अखत्यारितील १०,८६० चौरस मीटर तर विकसकाला २९,२०५ चौरस मीटर बांधकाम मिळणार आहे. ज्यामध्ये सुसज्ज बसस्थानक, विश्रामगृह, उपाहारगृह, बसस्थानक, वर्कशॉप यांचा समावेश असणार आहे. या कामाची निविदा प्रक्रिया सुरू झाल्याने भिवंडीमध्ये स्वतंत्र अत्याधुनिक एसटीचे स्थानक उभारण्याचा मार्ग मोकळा झाला आहे. या निर्णयामुळे भिवंडीतील हजारो प्रवाशांना दिलासा मिळणार असून अर्थव्यवस्थेलाही चालना मिळेल, असा दावा केला जात आहे.
---------------------------------------------------
आमदारांचा पाहणी दौरा
भिवंडीकरांच्या दीर्घकालीन मागणीची पूर्तता झाली आहे. या बसस्थानकामुळे भविष्यातील वाहतूक व्यवस्था अधिक सक्षम, सुनियोजित होण्यास मदत होणार आहे. ही निविदा प्रक्रिया पारदर्शकपणे होईल. तसेच महिन्याभरात ठेकेदाराची नियुक्ती केली जाणार असल्याची माहिती आमदार महेश चौघुले यांनी दिली. या वेळी बसस्थानक व्यवस्थापक इम्रान पटेल, भाजप अध्यक्ष रवी सावंत, मंडळ अध्यक्ष गजानन असावरे आदी उपस्थित होते.