भातशेतीला बांबू लागवडीचा पर्याय

मुरबाड, ता. २७ (बातमीदार)ः भातशेतीच्या मर्यादा स्पष्ट झाल्याने शेतकऱ्यांनी आता बांबू लागवड करावी, असे आवाहन महाराष्ट्र राज्य कृषी मूल्य आयोगाचे अध्यक्ष पाशा पटेल यांनी केले. मुरबाड येथे बांबू लागवडीबाबतच्या मार्गदर्शनपर मेळाव्यात ते बोलत होते.
शासनाकडून सात लाख चार हजारांचे अनुदान घेऊन बांबू शेती करायची, सोबत आंतरपीक पण घ्यायचे, शेतकरी उत्पादक कंपन्या स्थापन करून आदिवासी ठाणे जिल्ह्याचा कायापालट करू, असा निर्धार श्रमजीवी संघटना आणि ठाणे जिल्हा प्रशासनाने केला आहे. त्यानुसार राज्य कृषी मूल्य आयोगाचे अध्यक्ष पाशा पटेल यांनी मुख्यमंत्री पर्यावरण व शाश्वत विकास टास्क फोर्स कार्यकारी समिती अध्यक्ष विवेक पंडित, अध्यक्ष, राज्यस्तरीय आदिवासी विकास आढावा समिती (मंत्री दर्जा) यांच्या अध्यक्षतेखाली बांबू लागवडीचे मार्गदर्शनपर मेळावे ठाणे जिल्ह्यात घेत आहेत. मुरबाडमधील कार्यक्रमाचे प्रास्ताविक तहसीलदार अभिजित देशमुख यांनी केले. बांबूविषयक आंतरराष्ट्रीय तज्ज्ञ संजीव कर्पे यांनी शेतकऱ्यांना बांबू लागवडीचे महत्त्व स्पष्ट करून दिले. श्रमजीवी संघटनेचे बाळाराम भोईर यांनी मंजूर झालेले वनपट्टे, आदिवासींच्या ताब्यात असलेली वनजमीन, वनपट्टे मंजुरीच्या योजनांना मनरेगा योजनेतून बांबू लागवडीसाठी सरकारने परवानगी दिली पाहिजे, अशी मागणी केली.
--------------------------------------
२० हजार हेक्टरवर लागवड
- मुरबाड तालुक्यात २० हजार हेक्टरवर बांबू लागवड नियोजित करण्यात आले आहे. बांबू लागवडीसाठी प्रति हेक्टर सात लाख चार हजार रुपये अनुदान चार वर्षांमध्ये प्रत्येक शेतकऱ्याला मिळू शकते. बांबू लागवडीची रोपे, खड्डे खणणे, खत देणे, निगा राखणे या सर्व कामासाठी शासनाचे अनुदान मिळत आहे, अशी माहिती या वेळी पटेल यांनी दिली.
- महात्मा गांधी रोजगार हमी योजनेतून बांबू लागवड, बांबूपासून होणाऱ्या २,००० प्रकारच्या वस्तू निर्मिती, वातावरण बदलाच्या संकटात उपयुक्त करणारी बांबू लागवड, भातशेतीचे अर्थशास्त्र आणि बांबूपासून मिळणारे अनुदान आणि अतिरिक्त उत्पन्नाबद्दल शेतकऱ्यांना प्रात्यक्षिक देऊन मार्गदर्शन केले. तसेच कागद निर्मितीसाठी आणि प्रामुख्याने इंधन निर्मितीसाठी एक महत्त्वाचे पीक बांबू लागवडीचा पर्याय उपयुक्त ठरणार आहे.