गौतम बुद्धांचा अवमान करणाऱ्यांवर कारवाईची मागणी

गौतम बुद्धांचा अवमान करणाऱ्यांवर कारवाईची मागणी
धारावी, ता. २७ (बातमीदार) : प्रसिद्धी मिळविण्यासाठी अनेक जण कोणत्याही थराला जातात. असाच प्रकार इन्स्टाग्रामवर एका परिवाराने केला आहे. भगवान गौतम बुद्ध यांची मूर्ती हातात घेऊन बुद्धमूर्तीचा माइक म्हणून वापर करीत ‘या नटीनं मारली मिठी’ या गाण्यावर नृत्य करीत आहेत. अशा प्रकारे गौतम बुद्धांच्या मूर्तीची विटंबना केल्याप्रकरणी आर्यवी भाटिया, तिची मैत्रीण आणि तिची आई यांच्यावर कठोर कायदेशीर कारवाई करण्यासाठी शाहूनगर पोलिस ठाण्याचे वरिष्ठ पोलिस निरीक्षक रेहमतुल्ला सय्यद यांची शनिवारी (ता. २४) सामाजिक कार्यकर्त्यांनी भेट घेतली.
शाहूनगर पोलिस ठाण्याचे वरिष्ठ पोलिस निरीक्षक यांनी या प्रकरणी मुलींवर कारवाई करण्याचे आश्वासन दिल्याचे अनिश खंडागळे यांनी सांगितले. या वेळी विभागातील अजय देठे, मंगेश शिरसाट, लक्ष्मण चंदनशिवे, अनिल साळवे, संभाजी देठे, प्रकाश लांडगे, अश्विनी जगताप आदींसह धम्मबांधव उपस्थित होते.