मिरॅकल कंपनीत उपोषणकर्त्यांकडून सुरक्षारक्षकावर हल्ला

मिरॅकल कंपनीत उपोषणकर्त्यांकडून सुरक्षारक्षकावर हल्ला
आठ ते दहा उपोषणकर्त्यांवर पोलिस ठाण्यात गुन्हा दाखल
अंबरनाथ, ता. २७ (वार्ताहर)ः येथे उपोषणकर्त्यांनी कंपनीच्या सिक्युरिटी गार्डवर हल्ला केल्याची घटना उघडकीस आली आहे. हा हल्ला कंपनीत नाका कामगारांची बेकायदा भरती होत असल्याच्या गैरसमजातून करण्यात आला. याप्रकरणी आठ ते दहा उपोषणकर्त्यांवर शिवाजीनगर पोलिस ठाण्यात गुन्हा दाखल करण्यात आला आहे.
अंबरनाथ पूर्व आनंदनगर एमआयडीसीमधील मिरॅकल केबल कंपनीत गेल्या दोन महिन्यांपासून कर्मचाऱ्यांचे उपोषण सुरू आहे. २६० कर्मचाऱ्यांना तडकाफडकी कामावरून काढून टाकण्यात आल्याने हे उपोषण सुरू आहे. दरम्यान, कंपनीकडून बेकायदा नाका कामगारांची भरती होत असल्याचा गैरसमज उपोषणकर्त्यांचा झाला आणि यातूनच मिरॅकल कंपनीच्या प्रेमचंद पांडे (वय ५३) या सिक्युरिटी गार्डवर आठ ते दहा जणांनी हल्ला केला.
यासंदर्भात दिलीप कुमार मुंडे, अंकुश, अक्षय आग्रे, सुरेंद्र सिंग, सुरेश मारुती सपकाळ, अखिलेश गौड, गणेश शिंदे, महेंद्र काते, अरुण सिंग, संजय कुमार, राजेंद्र पाल अशा १० जणांवर गुन्हा दाखल झाला आहे. सोमवारी (ता. २६) रात्री साडेबाराच्या सुमारास भारत कंपनीच्या समोर सार्वजनिक रोडवर हा हल्ला करण्यात आला. रात्रीच्या अंधारात कंपनीत काही नाका कामगारांची भरती करून त्यांच्याकडून काम करून घेतले जात असल्याच्या गैरसमजातून हा हल्ला झाला. यामध्ये मिरॅकल कंपनीच्या सिक्युरिटी गार्डला बेदम चोप बसला आहे. शिवाजीनगर पोलिस ठाण्यात १० जणांवर विविध कलमांतर्गत याप्रकरणी गुन्हा दाखल करण्यात आला असूनस पोलिस अधिक तपास करीत आहे.

नोट : सोबत फोटो जोडलेले आहे.