बियाणे खरेदीसाठी कृषी सेवा केंद्रांवर गर्दी

बियाणे खरेदीसाठी कृषी सेवा केंद्रांवर गर्दी

विक्रमगड, ता. २८ (बातमीदार) : यंदा मे महिन्यातच मॉन्सून दाखल झाला आहे. त्यामुळे मॉन्सूनपूर्व कामांसाठी शेतकऱ्यांची धावपळ सुरू झाली आहेत; मात्र पाऊस थांबत नसल्याने शेतीची कामे खोळंबली आहेत. त्यात तालुक्यातील शेतकरी पेरणीसाठी बी-बियाणे साठवण व खरेदीसाठी कामाला लागला आहे. विक्रमगड तालुक्यात कृषी सेवा केंद्रावर खते बी-बियाणे खरेदीसाठी शेतकरी गर्दी करू लागले आहेत.

साधारणपणे या खरीप हंगामात विक्रमगड तालुक्यात भातपीक, नागली व भाजीपाला अशी पिके घेतली जातात. भाजीपाला पिके कमी कालावधीत शेतकऱ्यांना पैसे मिळवून देणारी पिके आहेत. तर भातपीक हे शेतकऱ्यांचे वर्षभराचे उदरनिर्वाहाचे साधन आहे. निसर्गाने साथ दिली तर भातपिकातून ही चांगले पैसे शेतकऱ्यांना मिळतात. पहिला पाऊस पडला की शेतकरी भातपीक पेरणी करतात. तर भाजीपाला मेथी, कोंथिबीर, दोडके, घोसाळे, मिरची, काकडी अशी भाजीपाला पिके व तूर पिके घेतली जातात.

यंदा हवामान खात्याने पाऊस जून महिन्यात सरासरी अंदाज सांगितला आहे. त्यामुळे शेतकरी बी-बियाणे, खते घेण्यासाठी कृषी सेवा केंद्रावर गर्दी करू लागले आहेत. विक्रमगड शहरात एकूण सात ते आठ कृषी सेवा केंद्र तर तालुक्यात एकूण १४-१५ कृषी सेवा केंद्र आहेत. नेहमीप्रमाणे भात बी- बियाणांच्या किमती वाढल्या आहेत. त्याचबरोबर उडीद, तूर व भाजीपाला पिकांच्या बियाणांच्या किमतीही पाच ते दहा टक्क्यांनी वाढल्या आहेत. मॉन्सून लवकर सुरू होईल, या आशेने कृषी सेवा केंद्रातून शेतकरी भातबियाणे खरेदी करीत आहेत.

तालुक्यातील ९५ गावे ८६ पाड्यांमध्ये ७,५५८ हेक्टर क्षेत्रावर मोठ्या प्रमाणावर भातशेती करण्यात येते. येथील शेतकरी जया, रत्ना, कोलम, सुवर्णा, कर्जत-३, मसुरी अशा विविध प्रकारच्या जातींच्या भाताचे बियाणे खरेदीसाठी कृषी सेवा केंद्रावर गर्दी करीत असल्याचे कृषी सेवा केंद्रचालकांनी सांगितले.

मजुरीत वाढ
शेतीच्या कामासाठी मजूर मिळत नाहीत, त्यामुळे मजुरीच्या दरात वाढ झाल्याचे शेतकरी सांगत आहेत. पुरुषांना ३०० रुपये तर स्त्रियांना २५० रुपये मजुरी दिली जाते. विक्रमगड, डहाणू व वाडा, नाशिक या भागातून मजूर आणण्यासाठी शेतकऱ्यांना वणवण करावी लागत असल्याचे शेतकरी सांगत आहेत.