दिवा पोलिस ठाणे उभारणीचा पेच

सकाळ वृत्तसेवा
ठाणे, ता. २८ : बेकायदा बांधकामांचे शहर म्हणून ओळखल्या जाणाऱ्या दिवा शहरात वाढत्या गुन्हेगारीमुळे नवे पोलिस ठाणे काळाची गरज आहे. याच अनुषंगाने ठाणे शहर पोलिसांनी पोलिस महासंचालक कार्यालयाकडे पाठवलेल्या सहा नव्या पोलिस ठाण्यांच्या प्रस्तावांमध्ये दिव्याचादेखील समावेश आहे; पण बेकायदा बांधकामांमुळे पोलिस ठाणे उभारणीसाठी जागाच नसल्याने प्रशासनासमोर नवा प्रश्‍न निर्माण झाला आहे.
रेल्वेच्या नकाशावर दिवा जंक्शन अशी ओळख आहे. ठाणे महापालिकेच्या कार्यक्षेत्रात येणाऱ्या खाडीकिनारी असलेल्या दिवा शहराची लोकसंख्या सुमारे सहा ते सात लाखांच्या घरात गेली आहे. बेकायदा बांधकामांमुळे हे शहर सध्या चर्चेत आहे. या शहरातील नागरीकरणाने वाढलेली लोकसंख्या आणि गुन्हेगारी प्रमाणही वाढताना दिसत आहेत; पण लोकसंख्येच्या तुलनेत दिव्यात एक पोलिस चौकी आहे. वाढत्या लोकसंख्येमुळे पोलिस ठाण्याची गरज लक्षात घेताना नागरिकांसह राजकीय पक्षांकडून सातत्याने नवे पोलिस ठाणे असावे, अशी मागणी होत आहे. त्यानुसार नव्या पोलिस ठाण्याच्या प्रस्तावात दिवा पोलिस ठाण्याचा समावेश शहर पोलिस दलाकडून तयार करण्यात आला आहे. याबाबतचा प्रस्ताव पोलिस महासंचालक कार्यालयात पाठविण्यात आला आहे; पण शहरातील बेकायदा बांधकामांमुळे पोलिस ठाण्यासाठी जागाच नसल्याने विविध अडचणी येत आहेत.
----------------------------------------------
दिवा पोलिस ठाण्याचा प्रस्ताव पोलिस महासंचालक कार्यालयाकडे पाठवला आहे; पण बेकायदा बांधकामांमुळे पोलिस ठाण्यासाठी लागणाऱ्या जागेचा प्रश्‍न निर्माण झाला आहे.
- आशुतोष डुंबरे, पोलिस आयुक्त, ठाणे शहर