भिवंडीत घरफोडीच्या तीन घटना

घरफोडीत दागिन्यांसह रोख रकमेची चोरी
भिवंडी, ता. २८ (वार्ताहर) : शहरात घरफोडीच्या तीन वेगवेगळ्या घटना घडल्या आहेत. यात चोरट्यांनी सोन्याच्या दागिन्यांसह रोख रक्कम चोरून नेल्याचे समोर आले आहे. पहिल्या घटनेत तालुक्यातील काल्हेर येथील रिक्षाचालक अक्षय गायकवाड (३३) यांच्या घरात चोरट्याने दोन मोबाईल, सोन्याची कर्णफुले आणि रोख रक्कम असा एकूण ५२ हजार रुपये किमतीचा मुद्देमाल मंगळवारी (ता. २७) रात्रीच्या सुमारास चोरून नेला आहे. तर दुसऱ्या घटनेत विजय कोरडे (४८) हे काम करीत असलेल्या वळगाव येथील पारसनाथ कॉम्प्लेक्समधील रामव्हिजन लिमिटेड या कंपनीच्या गोदामातील कार्यालयाची खिडकी वाकवून २१ हजार रुपयांची रोख रक्कम २६ ते २७ मे रोजी रात्रीच्या वेळी चोरून नेली आहे. या दोन्ही चोरीप्रकरणी नारपोली पोलिस ठाण्यात अज्ञातांविरोधात गुन्हा दाखल केला आहे. तर तिसऱ्या घटनेत मंगळवारी रात्री नागाव परिसरातील हनुमान मंदिराजवळील चाळीत राहणारे इंद्रजीत लालप्रताप गुप्ता (४८) हे त्यांच्या कुटुंबासह घरी झोपलेले असताना अज्ञात चोरट्याने घराच्या किचनची खिडकी तोडून घरात प्रवेश केला. लोखंडी कपाटाचे लॉकर चावीने उघडून एक लाख ८२ हजार रुपयांचे दागिने चोरून नेले आहेत. याप्रकरणी अज्ञात चोरट्याविरोधात शांतीनगर पोलिस ठाण्यात गुन्हा दाखल केला आहे.