पालिकेच्या शौचालयात साहित्याचा भरणा

पालिकेच्या शौचालयात साहित्याचा भरणा
नागरिकांच्या गैरसोयीमुळे तीव्र संताप

धारावी, ता. २८ (बातमीदार) : धारावी मुख्य रस्त्यावरील चमडा बाजार विभागातील अहालेहादिस मशिदीमागील शौचालय खासगी व्यक्तीकडून चालवले जाते. शौचालय पालिकेकडून अधिकृतपणे कोणत्याही संस्थेला चालवण्यास दिले तर तसा फलक लावण्याचा नियम आहे. मात्र येथील शौचालयाबाहेर असा माहिती देणारा कोणताही फलक लावण्यात आला नाही. यामुळे हे शौचालय कोण चालवते, असा सवाल स्थानिकांनी उपस्थित केला आहे. शौचालयात एकूण १० सीट आहेत. त्यातील चार सीटचा वापर केला जात नाही, मात्र त्या चार खोल्यांमध्ये इतर साहित्य ठेवण्यात आले आहे. महिलांसाठी असलेले शौचालय नादुरुस्त झाले असून, नाइलाजाने रहिवाशांना आहे त्या परिस्थितीत शौचालय वापरावे लागत आहे. त्यामुळे स्थानिकांनी तीव्र संताप व्यक्त केला आहे.
स्थानिक रहिवासी खुर्शीद शेख यांनी शौचालय पालिकेने अधिकृतपणे चालवण्यास दिले असेल, तर तसा फलक शौचालयाजवळ का लावण्यात आलेला नाही, काही अडचणी आल्यास कुणाला संपर्क करावा, असे प्रश्न उपस्थित उभे केले आहेत. अनेकदा खुर्शीद यांनी यासंदर्भात पालिकेच्या अधिकाऱ्यांना तक्रार दिली, मात्र त्याकडे दुर्लक्ष करण्यात आले.

धारावीत अनेक ठिकाणी अशी शौचालये कुणीही ताब्यात घेऊन तिथे पैसा कमावत असल्याचे दिसून येत आहे. यावर पालिकेने नियंत्रण ठेवले पाहिजे, अशी मागणी धारावीत होत आहे.
-----------------------------
धारावी : चमडा बाजार येथील शौचालयात साहित्य ठेवण्यात आले आहे.