नुकसानग्रस्‍त शेतीची अधिकाऱ्यांकडून पाहणी

रोहा, ता. ३ (बातमीदार) ः तालुक्यात पाच-सहा दिवसांपासून मुसळधार पावसाने थैमान घातल्याने शेतीत पाणी साचले आहे. कोलाड खांब परिसरातील तिसे, चिंचवली, वरसगाव, कोलाड, गोवे, मुठवली, शिरवली, पुगाव, पुई या गावांसह तालुक्यातील अन्य
भागांतील भातशेतीचे मोठ्या प्रमाणात नुकसान झाले आहे. नुकसानग्रस्त शेतीचे पंचनामे व्हावे व शेतकऱ्यांना नुकसानभरपाई मिळावी, अशी मागणी शेतकऱ्यांकडून करण्यात येत आहे. रोहा प्रांत अधिकारी ज्ञानेश्वर खुटवड व तहसीलदार डॉ. किशोर देशमुख यांनी नुकतीच शेतीच्या बांधावर जाऊन प्रत्यक्ष पाहणी केली आणि तातडीने शेतीचे पंचनामे करण्याचे आदेश प्रांत अधिकारी ज्ञानेश्वर खुटवड यांनी दिले आहेत.
शेतीप्रमाणेच कडधान्यही पिकवले जाते. हातातोंडाशी आलेला घास निसर्गाने हिरावून घेतल्याने शेतकरी हवालदिल झाले आहेत. तिसे गावातील शेताच्या बांधावर जाऊन प्रांत अधिकारी ज्ञानेश्वर खुटवड यांनी पाहणी केली. या वेळी कृषी अधिकारी महादेव करे, मंडळ अधिकारी, तलाठी आणि अन्य कर्मचारी उपस्थित होते.

कोलाड भागात मोठ्या प्रमाणात उन्हाळी भातशेती केली जाते. यंदा पावसामुळे शेतीचे मोठ्या प्रमाणात नुकसान झाले आहे. त्‍याचे तत्काळ पंचनामे करण्याचे आदेश दिले आहेत. नुकसानग्रस्त शेतकऱ्यांना सरकारकडून मदत मिळवून देण्यासाठी प्रयत्नशील आहोत.
- ज्ञानेश्वर खुटवड, प्रांत अधिकारी, रोहा

रोहा : तिसे गावात नुकसान झालेल्या शेतीची अधिकाऱ्यांनी पाहणी केली.