नाले, गटाराचे पाणी इमारतीचा आवारात

नाले, गटाराचे पाणी इमारतीच्या आवारात
कल्याण, ता. २८ (वार्ताहर) : डोंबिवली एमआयडीसी निवासी भागात नवीन गटारे, नाल्यांची अर्धवट कामे व त्यांची व्यवस्थित साफसफाई झाली नाही. तसेच रस्त्यांचे काँक्रीटीकरण करताना रस्ता उंच ते इमारतीचा काही भाग रस्त्याखाली, अशा सर्व समस्येमुळे बहुतेक गृहनिर्माण सोसायट्यांच्या आवारात पाणी साचले आहे.

एम्स हॉस्पिटल रोडवरील सुदर्शननगर, मिलापनगर, सुदामानगर, अभिनव शाळा परिसर आदींच्या रहिवासी इमारतीच्या आवारात पावसाचे आणि गटार नाल्यामधील घाण पाणी भरले आहे. त्याचा निचरा होत नसल्याने रहिवाशांना मोठा फटका बसला आहे. याला जबाबदार एमआयडीसी आणि कल्याण- डोंबिवली महापालिका असून त्यांनी युद्धपातळीवर ही मोठी समस्या दूर करण्यासाठी प्रयत्न करावेत, अशी मागणी होत आहे.

सध्या एमआयडीसीमध्ये नवीन गटारे, नाले बांधण्याचे काम एमआयडीसीकडून सुरू आहे. ती कामे अर्धवट आणि चुकीच्या पद्धतीने सुरू आहेत. तर मोठे नाले, गटारे हे साफसफाईचे काम कल्याण-डोंबिवली महापालिकेकडून होत आहे. त्यांनीही नालेसफाई योग्य पद्धतीने केली नाही. काही ठिकाणी नालेसफाईची कामे झालीच नाही. या त्यांच्या कामावर लोकप्रतिनिधी आणि राजकीय पुढारी यांच्या कुठलाही अंकुश नसल्याने एमआयडीसी व कल्याण-डोंबिवली महापालिकेचे ठेकेदार आणि त्यांच्यावर नियंत्रण ठेवणारे प्रशासनाचे अधिकारी बिनधास्त झाले आहेत, असा आरोप सामाजिक कार्यकर्ते राजू नलावडे यांनी केला आहे.