पिसवलीतून गांजा तस्कर अटकेत

पिसवलीतून गांजा तस्कर अटकेत
सकाळ वृत्तसेवा
डोंबिवली, ता. २९ : पिसवली गाव परिसरात शिळफाटा रस्त्यावर अमली पदार्थ विरोधी पथक आणि मानपाडा पोलिसांनी संयुक्त कारवाई करून उत्तर प्रदेशचा मूळ निवासी असलेल्या २१ वर्षाच्या गांजा तस्कराला मंगळवारी (ता. २७) अटक केली आहे. त्याच्याकडून पोलिसांनी ४० हजार रुपये किमतीचा तीन किलो गांजा जप्त केला आहे. शिवलोचना हंसराज सिंह (वय २१) असे या तस्कराचे नाव आहे.

मानपाडा पोलिस ठाण्याच्या हद्दीत शिळफाटा रस्त्यावरील पिसवली गाव हद्दीत एक व्यक्ती गांजाविक्रीसाठी येणार आहे, अशी माहिती मानपाडा पोलिस आणि अमली पदार्थ विरोधी कारवाई पथकाला मिळाली होती. पथकाने मंगळवारी दुपारी १२च्या दरम्यान पिसवली भागात सापळा लावला. पिसवली परिसरात हा तरुण येणाऱ्या जागेत साध्या वेशातील पोलिस टेहळणी ठेवून होते. ठरल्या वेळेत एक तरुण पिसवली भागातील एका मैदान भागात आला. तो बराच उशीर त्या भागात फिरत होता. पोलिसांनी त्या संशयित तरुणाकडे चौकशी केली असता त्याला समाधानकारक उत्तरे देता आली नाहीत. त्याने पळ काढण्याचा प्रयत्न केला असता पोलिसांनी त्याला ताब्यात घेत अटक केली.

पोलिसांना त्याच्या अंगझडतीत तीन किलो वजनाचा ४० हजार रुपये किमतीचा गांजा आढळून आला. हा गांजा त्याने कोठून आणला. तो हा गांजा कोणाला विकणार होता. याची चौकशी पोलिस करत आहेत. पोलिसांनी त्याच्यावर मानपाडा पोलिस ठाण्यात अमली पदार्थ विरोधी कायद्याने गुन्हा दाखल केला. ही कारवाई पोलिस निरीक्षक जयपालसिंह राजपूत, सहाय्यक पोलिस निरीक्षक अनिल गायकवाड, सहाय्यक उपनिरीक्षक जितेंद्र ठोके, हवालदार सदाशिव देवरे, अमित शिंदे, राहुल शिंदे, खुशाल नेरकर यांच्या पथकाने केली.