पुराच्या २५ पोती कांदा गेला वाहून

पुराच्या पाण्यात २५ पोती कांदा गेला वाहून
नदीला खांडी पडल्‍याने नुकसान

रोहा, ता. २९ (बातमीदार) ः आठवडाभर सुरू असलेल्‍या मुसळधार पावसामुळे गोवे गावालगत बारमाही वाहणाऱ्या महिसदरा नदीतील पाण्याची पातळी वाढल्याने पूरपरिस्थिती निर्माण झाली होती. पुराचे पाणी शेतात शिरल्याने याठिकाणी ठेवलेला २३ हजार रुपये किमतीचा २५ पोती कांदा वाहून गेला. त्‍यामुळे शेतकरी हवालदिल झाला असून नुकसानभरपाई मिळावी, अशी मागणी होत आहे.
गोवे येथील शेतकरी अंकुश बापूराव म्हानवर तीन-चार वर्षांपासून अडीच एकर शेतजमिनीत कांद्याचे पीक घेतात. कांदा सुकवून चांगला भाव मिळेल, या उमेदने त्यांनी शेतात कांद्याच्या पोती भरून ठेवल्या होत्या; परंतु तुफान पर्जन्यवृष्टीमुळे पूरपरिस्थिती निर्माण झाली आणि कांदा वाहून गेल्याने शेतकऱ्याचे मोठे नुकसान झाले.
महिसदरा नदीला अनेक ठिकाणी खांडी गेल्या आहेत. यामुळे नदी दुथडी भरून वाहू लागली आहे. दरवर्षी भातशेतीत पाणी घुसून भातशेतीचे मोठे नुकसान होते. याविषयी कोलाड पाटबंधारे विभागाकडे वेळोवेळी अर्ज दिल्यानंतर टाळाटाळ केली जाते. नदीला खांडी गेल्‍या असल्‍या तरी अद्याप दुरुस्‍ती झालेली नाही.

रोहा : नदीला पूर आल्याने कांदा वाहून गेला.