३८ उपशिक्षकांची मुख्याध्यापकपदी बढती

सकाळ वृत्तसेवा
ठाणे, ता. २९ ः ठाणे महापालिकेत सलग दुसऱ्या दिवशी ९१ जणांना बढती मिळाली आहे. यामध्ये ३८ उपशिक्षकांना मुख्याध्यापकपदावर तर ५३ वरिष्ठ लिपिकांना उपअधीक्षक बनवण्यात आले आहे. त्यामुळे पालिका आस्थापनेतील १५८ जणांना पदोन्नती मिळाली आहे.
ठाणे पालिका आयुक्त सौरभ राव यांच्या सूचनेवरून आस्थापनेतील ३८ उपशिक्षक आणि ५३ वरिष्ठ लिपिकांची पदोन्नतीचे आदेश अतिरिक्त आयुक्त प्रशांत रोडे यांनी बुधवारी काढले. त्यापूर्वी, मंगळवारी, वरिष्ठ लिपिक या पदावर ४६ जणांना, अग्निशमन प्रणेता या पदावर १९ जणांना, तर सहाय्यक अग्निशमन केंद्र अधिकारी या पदावर दोन जणांना पदोन्नती देण्यात आली होती. पालिकेच्या कामाची व्याप्ती पाहता रिक्त पदांमुळे नागरिकांना सुविधा देण्याचे कामकाज प्रभावीपणे होण्यासाठी उपमुख्यमंत्री एकनाथ शिंदे यांच्या निर्देशांनुसार वरिष्ठ लिपिकांना उपअधीक्षकपदावर शासकीय निकषांनुसार पदोन्नती देण्यात आली आहे. या निर्णयामुळे पालिकेच्या कामकाजात सकारात्मक बदल होईल, असा विश्वास व्यक्त केला जात आहे.
-------------------------------------
सलग दोन दिवस आनंदवार्ता
महापालिका आयुक्त सौरभ राव यांनी अधिकारी, कर्मचारी, शिक्षक यांच्या पदोन्नत्तीसाठी विशेष मोहीम हाती घेण्याचे निर्देश आस्थापना विभागाला दिले होते. त्यानुसार, मंगळवारी ६७ आणि बुधवारी ९१ कर्मचाऱ्यांची पदोन्नती करण्यात आली आहे. या अधिकारी आणि कर्मचाऱ्यांची पदस्थापना लवकरच होणार, असल्याचे महापालिका प्रशासनाने स्पष्ट केले आहे.