पोलिसाच्या पत्नीचे दागिने तर जीएसटी विभागातील महिला अधिकाऱ्याचा मोबाईल फोन लुटला

खारघरमध्ये चोरांचा सुळसुळाट
पोलिसाच्या पत्नीचे दागिने तर जीएसटी विभागातील महिला अधिकाऱ्याचा मोबाईल फोन लुटला
नवी मुंबई, ता. २९ (वार्ताहर): खारघरमध्ये चेन स्नॅचिंग आणि मोबाईलचोरी करणाऱ्या चोरांचा सुळसुळाट वाढला आहे. या चोरांनी खारघरमधील एका पोलिस कर्मचाऱ्याच्या पत्नीची सोन्याची चेन खेचली, तर दुसऱ्या घटनेत जीएसटी विभागातील महिला अधिकाऱ्याचा महागडा मोबाईल लुटून पोबारा केला. खारघर पोलिसांनी या दोन्ही घटनांतील चोरांविरोधात जबरी चोरीचे गुन्हे दाखल करून त्यांचा शोध सुरू केला आहे.
तक्रारदार महिला खारघर सेक्टर-३ मध्ये राहण्यास असून, त्यांचे पती सहाय्यक पोलिस उपनिरीक्षक म्हणून कार्यरत आहेत. या महिला बुधवारी (ता. २८) सकाळी नेहमीप्रमाणे मॉर्निंग वॉक करण्यासाठी गेल्या होत्या. वॉक करून त्या पावणेआठ वाजण्याच्या सुमारास आपल्या घरी जात होत्या. या वेळी पाठीमागून भरधाव मोटारसायकलवरून येऊन एका चोराने या महिलेच्या गळ्यातील एक तोळे वजनाची ५० हजार रुपये किमतीची सोन्याची चेन खेचून पलायन केले. या महिलेने आरडाओरडा केला, मात्र तोपर्यंत चोर मोटारसायकलवरून पसार झाला. त्यानंतर या महिलेने खारघर पोलिस ठाण्यात तक्रार दाखल केली.

जीएसटी विभागातील महिला अधिकाऱ्याचा महागडा मोबाईल फोन लुटला
खारघर सेक्टरमध्ये राहणाऱ्या ३७ वर्षीय जीएसटी विभागातील महिला कर निरीक्षक म्हणून कार्यरत आहेत. त्या सोमवारी (ता. २६) सायंकाळी सेंट्रल पार्कजवळ वॉकिंगसाठी गेल्या असता पाठीमागून मोटारसायकलवरून आलेल्या एका चोराने त्यांच्या हातातील ८० हजार रुपये किमतीचा आयफोन-१६ प्रो हा मोबाईल हिसकावून पलायन केले. या महिलेने त्याच्या मागे पळत जाण्याचा प्रयत्न केला, मात्र तो मोटारसायकलवरून पसार झाला. याप्रकरणी त्यांनी खारघर पोलिस ठाण्यात तक्रार दाखल केली.