वाहतूक कोंडीमुळे बैठकांचे सत्र

भिवंडी, ता. २९ (बातमीदार): भिवंडी महापालिकेच्या विकास आराखड्यानुसार शहरात रस्ता रुंदीकरण होत नसल्याने पार्किंगअभावी वाहतूक कोंडीची समस्या दिवसेंदिवस वाढत आहे. त्यावर उपाययोजना करण्यासाठी वाहतूक पोलिस विभाग, महापालिका अधिकाऱ्यांची कृती समिती नेमण्यात आली आहे, पण या समितीला कोंडी सोडवण्यात अपयश आल्याने भिवंडीकर बेजार झाले आहेत.
भिवंडी शहरातील वाहतूक कोंडीवर उपाययोजनांकरिता पोलिस आणि महापालिका अधिकाऱ्यांची कृती समिती स्थापन करण्यात आली आहे. या समितीकडून शहरातील वाहतूक कोंडीचा आढावा घेण्यात येत आहे. याच अनुषंगाने बुधवारी (ता. २८) बैठक घेण्यात आली. या वेळी शहरातील विनापरवाना रिक्षांवर परिवहन विभागामार्फत सुरू असलेल्या कारवाईचा आढावा घेण्यात आला. महापालिका, पोलिस विभाग आणि परिवहन विभाग यांनी एकत्रित पाहणी करून शहरामध्ये नो पार्किंग, दिशादर्शक फलक लावणेबाबत चर्चा करण्यात आली. शहरामध्ये मंजूर रिक्षा स्टँडवर एका वेळी किती रिक्षा उभ्या राहू शकतात याची पाहणी करून त्यानुसार मार्किंग करण्याच्या सूचना दिल्या गेल्या आहेत.
़़़़़़़ः----------------------------------------
सीसीटिव्हीचे काम अंतिम टप्प्यात
छत्रपती शिवाजी महाराज चौक येथील इमारतीमधील महापालिकेचे वाहनतळ चालवण्यासाठी निविदा प्रसिद्ध करण्याची कार्यवाहीचा निर्णय घेतला आहे. शहरामध्ये शासनाकडून सीसीटीव्हीचे काम सुरू असून, महिनाभरात हे काम पूर्ण होणार असल्याबाबत पोलिस विभागाने स्पष्ट केले. तसेच एसटी महामंडळाने भिवंडी बसस्थानकामध्ये रिक्षा पार्किंगसाठी जागा दिली जाणार आहे.
-------------------------------------
अतिक्रमणांवर कारवाईचे निर्देश
शहरातील महत्त्वाच्या उड्डाणपुलावर उलट दिशेने येणाऱ्या वाहनांना प्रतिबंध करणे आणि त्यांच्यावर दंड आकारण्याबाबत कारवाईच्या सूचना दिल्या. तसेच सार्वजनिक जागेवरील खासगी टेम्पो, ट्रक, जीप पोलिस विभागाने प्रतिबंधक कारवाई करावी. अंजूरफाटा चौकातील अतिक्रमण हटविण्यासाठी महसूल विभाग, पोलिस विभाग यांच्यासोबत पालिकेने समन्वय साधून कारवाई केली जाणार आहे.