कल्याण चक्की नाका येथे वाहतूक सिग्नल बंद

कल्याण चक्कीनाका येथे वाहतूक सिग्नल बंद
ठाकरे गटाकडून उपाययोजनेची मागणी
सकाळ वृत्तसेवा
डोंबिवली, ता. २९ : कल्याण पूर्वेतील चक्की नाका येथे मागील काही काळापासून मुख्य वाहतूक सिग्नल बंद अवस्थेत आहे. यामुळे दररोज सकाळी आणि सायंकाळी प्रचंड वाहतूक कोंडी निर्माण होत आहे. रस्त्यावरील प्रवास अतिशय त्रासदायक बनला आहे. सिग्नल बंद असल्याने वाहनचालक, पादचारी, शाळकरी मुले, ज्येष्ठ नागरिक आणि महिलांना प्रचंड गैरसोयींचा सामना करावा लागत आहे. यावर वाहतूक विभागाने तातडीने उपाययोजना करावी, अशी मागणी ठाकरे गटाने केली आहे.

कल्याण पूर्वेतील चक्कीनाका परिसरातील सिग्नल यंत्रणा बंद आहे. यामुळे येथे वाहन कोंडीची समस्या निर्माण होते. वाहनचालकांना कोणती ही शिस्त नसल्याने वाहने अडकून पडतात. तसेच अपघाताचे प्रमाण वाढण्याची भीती आहे. स्थानिक नागरिकांमध्ये असुरक्षिततेची भावना निर्माण झाली आहे. या परिस्थितीकडे वाहतूक विभागाने गांभीर्याने पाहून नागरिकांच्या सुरक्षिततेला प्राधान्य देत तातडीने आवश्यक पावले उचलावीत, अशी सर्व नागरिक, स्थानिक व्यापारी, शाळा व्यवस्थापन आणि सामाजिक संस्थांची कळकळीची मागणी आहे. ठाकरे गटाचे ग्रामीण विधानसभा प्रमुख रोहिदास मुंडे यांनी या समस्येकडे लक्ष वेधत यावर उपाययोजना करण्याची मागणी केली आहे.

आंदोलनाचा इशारा
मोटार वाहन कायदा १९८८ च्या कलम १९ (फ) नुसार सार्वजनिक वाहतुकीचा सुरक्षित आणि सुरळीत प्रवाह राखणे आवश्यक आहे. या अनुषंगाने, चक्कीनाका परिसरातील कल्याण ग्रामीण विधानसभा प्रमुख रोहिदास मुंडे यांनी वाहतूक विभागाकडे काही मागण्या केल्या आहेत. त्यात वाहतूक सिग्नलची त्वरित दुरुस्ती करावी, वाहतूक नियंत्रणासाठी पोलिस कर्मचारी तैनात करावेत, वाहनचालकांसाठी सूचना फलक लावण्यात यावेत अशी मागणी केली आहे. चक्कीनाका येथे जर वेळेत कार्यवाही झाली नाही, तर आंदोलनात्मक भूमिका घेतली जाऊ शकते, असा इशाराही मुंडे यांनी दिला आहे.