पनवेलमध्ये हरित पट्टा तयार करणार

पनवेल, ता. २९ (बातमीदार) ः ‘माझी वसुंधरा’ अभियानाच्या प्रभावी अंमलबजावणीसाठी पनवेल महापालिकेने व्यापक वृक्षारोपण मोहीम हाती घेतली आहे. महापालिका कार्यक्षेत्रातील विविध जागा, रस्ते दुभाजक तसेच इतर सरकारी जागांवर रोपलागवड करण्यात येणार आहे.
आयुक्त मंगेश चितळे यांच्या मार्गदर्शनाखाली विविध शाळा-महाविद्यालये, एनएसएस विभाग शिक्षक, पर्यावरण क्षेत्रात काम करणाऱ्या सामाजिक संस्था व स्वयंसेवी संस्थांच्या प्रतिनिधींची बैठक अतिरिक्त आयुक्त गणेश शेटे यांच्या अध्यक्षतेखाली नुकतीच मुख्यालयात घेण्यात आली. या वेळी उपायुक्त रविकिरण घोडके, उपायुक्त अभिषेक पराडकर, पर्यावरण विभागप्रमुख मनोज चव्हाण, महापालिका कार्यक्षेत्रातील २० हून अधिक विविध सामाजिक संस्था व स्वयंसेवी संस्थांचे प्रतिनिधी उपस्थित होते. महापालिका कार्यक्षेत्रातील पर्यावरण संवर्धनासाठी व रक्षणासाठी उपाययोजना करण्यात येत आहेत.
महापालिकेच्या व्यापक वृक्षारोपण मोहिमेमध्ये सर्वांचे योगदान महत्त्वाचे आहे. मोहिमेमध्ये सर्वांनी सहभाग घ्यावा. सामाजिक संस्थांनी, स्वयंसेवी संस्थांनी पुढाकार घेत वृक्षलागवड केल्यानंतर याचे दायित्व स्वीकारावे. जेणेकरून रोपण केलेल्या झाडांचे संगोपनही योग्‍य प्रकारे होईल. यासाठी सामाजिक संस्थांना लागणारी सर्व सहकार्य महापालिकेच्या वतीने करण्यात येणार असल्‍याचे अतिरिक्‍त आयुक्‍त गणेश शेटे यांनी सांगितले.