विकास कामातील अडथळे दूर करा

विकासकामातील अडथळे दूर करा
संजय पाटील यांचे पालकमंत्र्यांना निवेदन

मुलुंड, ता. ३१ (बातमीदार) : ईशान्य मुंबईचे खासदार संजय दिना पाटील यांनी जिल्हा नियोजन समितीच्या बैठकीनंतर शुक्रवारी (ता. ३०) भांडूप येथील त्यांच्या कार्यालयात माध्यमांशी संवाद साधताना विकासकामांतील अडथळ्यांविषयी तीव्र नाराजी व्यक्त केली. त्यांनी निधीअभावी अनेक कामे प्रलंबित असल्याचे सांगितले. ही समितीची तिसरी बैठक असून, प्रत्येक वेळी सामान्य नागरिकांच्या समस्या आणि प्रलंबित कामांचा मुद्दा उपस्थित केला जातो, मात्र यासाठी निधी उपलब्ध नसल्याची खंत त्यांनी व्यक्त केली. ईशान्य मुंबईतील आरोग्यसेवा ढासळली असून, सुसज्ज रुग्णालयांचा अभाव आहे. त्यामुळे नागरिकांना सायन वा राजावाडीसारख्या दवाखान्यांवर अवलंबून राहावे लागते. बंद असलेली रुग्णालये त्वरित सुरू करावीत, कर्मचाऱ्यांची संख्या वाढवावी आणि लल्लूभाई कम्पाउंडमधील रुग्णालय तत्काळ कार्यान्वित करावे, अशी मागणी त्यांनी केली.
खासदार पाटील यांनी मुलुंड ते घाटकोपर परिसरातील डोंगराळ भागात संरक्षक भिंत बांधण्यासाठी विशेष निधीची गरज असल्याचे निदर्शनास आणून दिले. तसेच फेरीवाल्यांसाठी धोरण ठरवावे, शिवाजीनगर व गोवंडी परिसरात वाढलेल्या अमली पदार्थांच्या विक्रीवर कठोर पोलिस कारवाई करण्याची मागणीही त्यांनी केली आहे.
खासदार पाटील यांनी पालकमंत्री आशीष शेलार यांच्याकडे निवेदन सादर केले असून, या सर्व समस्यांचे निराकरण करण्यात यावे, अशी मागणी केली आहे.
----------------------------
आरएमसी प्लांटमुळे प्रदूषण
धारावीतील रहिवाशांचे पुनर्वसन त्याच भागात करावे, शिवाजीनगर व नटवर पारेख कम्पाउंड येथील सीबीएसई शाळेची इमारत पालिकेकडे हस्तांतरित करून शाळा लवकर सुरू करावी, तसेच आरएमसी प्लांटमुळे होणारे प्रदूषण रोखण्यासाठी तो तातडीने बंद करावा, असेही त्यांनी पत्राद्वारे नमूद केले.