वीजरोधक मनोऱ्यांसाठी निधी मंजूर

किन्हवली, ता. ३१ (बातमीदार)ः शहापूर तालुक्यात परतीच्या पावसात वीज कोसळून जीवित, वित्तहानीचे प्रकार वाढले आहेत. त्यामुळे वीजरोधक मनोरे बसवावेत, अशी अनेक वर्षांपासून मागणी होत होती. अखेर ठाणे जिल्हाधिकारी कार्यालयातील जिल्हा नियोजन समितीने टाकीपठार परिसरातील आदिवासी वाड्यांमध्ये वीजरोधक मनोरे बसविण्यासाठी ८९ लाखांच्या निधीला प्रशासकीय मान्यता दिली आहे.
शहापूर तालुक्यातील नवरी जिल्हा परिषद गटातील टाकीपठार परिसरातील झापवाडी, गांगडवाडी, बेलकडी, खरपत नामपाडा, उंबरवाडी, रिकामवाडी, फणसवाडी, हिरव्याची वाडी आंबेखोर, कवट्याची वाडी, कुंभाईची वाडी परिसरात दरवर्षी वीज कोसळून जीवित, वित्तहानी होत असते. या आदिवासी पाड्यांमध्ये वीजरोधक मनोरे बसवावेत, अशी मागणी वर्षानुवर्षे होत होती. ‘सकाळ’ने देखील या मागणीचा सातत्याने पाठपुरावा केला होता. भाजपचे शहापूर विधानसभा क्षेत्रप्रमुख अशोक इरनक यांनी भाजपचे प्रदेश कार्यकारी अध्यक्ष रवींद्र चव्हाण यांच्या माध्यमातून जिल्हाधिकारी अशोक शिनगारे यांच्याकडे विशेष प्रयत्न केले होते. त्यानुसार जिल्हा नियोजन समितीने आपत्कालीन व्यवस्थेचे बळकटीकरण योजनेतून मनोरे बसवण्यासाठी ८९ लाखांच्या निधीला प्रशासकीय मान्यता दिली आहे.