मानवी मुल्यांसाठीच महामानवांचा संघर्ष

मानवी मूल्यांसाठीच महामानवांचा संघर्ष : बलभीम माथेले
कल्याण, ता. ३१ (वार्ताहर) : जात, धर्म आणि पंथांच्या भेदातून मुक्तता मिळावी, तसेच समानता व मानवी मूल्यांसाठीच सर्व महामानवांनी संघर्ष केला. सर्वच महामानवांच्या विचारांमागे मानवतेच्या हिताचा एक समान धागा आहे. या विचारांचा जागर करण्यासाठी महावितरणच्या कल्याण परिमंडलाकडून आयोजित करण्यात येत असलेल्या महामानवांच्या संयुक्त जयंती उत्सवाचा उपक्रम कौतुकास्पद व अनुकरणीय आहे, असे प्रतिपादन व्याख्याते बलभीम माथेले यांनी केले.

महावितरणच्या कल्याण परिमंडलाच्या वतीने कार्यालयाच्या सभागृहात गुरुवारी (ता. २९) सायंकाळी आयोजित महामानवांच्या संयुक्त जयंती उत्सवात ते बोलत होते. सलग चौथ्या वर्षी परिमंडलाकडून संयुक्त जयंती उत्सवाचे आयोजन केले होते. कार्यक्रमाच्या अध्यक्षस्थानी कल्याण परिमंडलाचे मुख्य अभियंता चंद्रमणी मिश्रा होते. माथेले यांनी आपल्या भाषणात छत्रपती शिवाजी महाराज ते महात्मा फुले, राजर्षी शाहू महाराज आणि डॉ. बाबासाहेब आंबेडकर यांच्यातील वैचारिक नात्याची गुंफण उलगडून दाखवली. तसेच भगवान गौतम बुद्धांपासून संत परंपरेतील नामदेव, ज्ञानेश्वर, तुकाराम, रोहिदास, सेवालाल, गाडगेबाबा आदी संतांच्या विचारांमधील समतेच्या धाग्यांची उकल त्यांनी केली. राजमाता जिजाऊ, अहिल्यादेवी, सावित्रीबाई फुले यांनी रुजविलेल्या जनकल्याणकारी मूल्यांचा जागर त्यांनी केला.

महामानवांच्या विचारांपासून कर्मचाऱ्यांना प्रेरणा मिळावी, या उद्देशाने उपक्रमात सातत्य ठेवल्याचे मुख्य अभियंता मिश्रा यांनी स्पष्ट केले. या वेळी कल्याण मंडल एकचे अधीक्षक अभियंता अनिल थोरात, कल्याण मंडल दोनचे अधीक्षक अभियंता विजय फुंदे, सहाय्यक महाव्यवस्थापक सुशील पावसकर, उपमुख्य औद्योगिक संबंध अधिकारी रामगोपाल अहिर हे उपस्थित होते. अभियंते, अधिकारी, कर्मचारी, विविध संघटनांचे पदाधिकारी या वेळी उपस्थित होते. कार्यक्रमाचे सूत्रसंचालन पांडुरंग गायके यांनी केले, तर औदुंबर कोकरे यांनी आभार मानले.