डॉ. विशाल कडणे यांचे शैक्षणिक नेतृत्व प्रेरणादायी

डॉ. विशाल कडणे यांचे शैक्षणिक नेतृत्व प्रेरणादायी
महायुवा शिक्षक संमेलनात आमदार प्रवीण दरेकर यांचे उद्‌गार
मुलुंड, ता. ३१ (बातमीदार) ः मुंबई शहर शिक्षक विकास मंडळ आणि सर्व मंगल एज्युकेशन ट्रस्ट यांच्या संयुक्त विद्यमाने मुलुंडच्या कालिदास नाट्यमंदिरात महायुवा शिक्षक संमेलन मोठ्या उत्साहात पार पडले. या कार्यक्रमाचे सूत्रसंचालन सिद्धेश कदम यांनी केले. संमेलनाचे संयोजन अत्यंत नियोजनबद्ध पद्धतीने डॉ. विशाल कडणे यांनी केले. प्रमुख पाहुणे म्हणून आमदार प्रवीण दरेकर उपस्थित होते.
या भव्य संमेलनात १६०० हून अधिक शिक्षकांनी सहभाग घेतला. शिक्षकांच्या वेतनवाढ, भत्ते, समायोजन, राष्ट्रीय शिक्षण धोरण, सेवा नियम यांसारख्या विविध विषयांवर सखोल चर्चा झाली. शिक्षकांच्या विविध मागण्यांबाबत बोलताना डॉ. कडणे यांनी शासनदरबारी सातत्याने पाठपुरावा करून शिक्षकांच्या न्याय्य हक्कांसाठी लढण्याचा निर्धार व्यक्त केला.
आपल्या भाषणात आमदार दरेकर यांनी डॉ. कडणे यांच्या नेतृत्वगुणांचे विशेष कौतुक करताना सांगितले, की त्यांच्या पुढाकारामुळे शिक्षक चळवळ अधिक मजबूत होत आहे. शासन शिक्षकांच्या समस्यांकडे गांभीर्याने पाहात असून, त्या सोडवण्यासाठी कटीबद्ध आहे, असे आश्वासन दिले.
संमेलनात विविध महत्त्वाच्या मागण्यांवर लक्ष केंद्रित करण्यात आले. जुनी पेन्शन योजना पुन्हा लागू करणे, १०-२०-३० वर्षांची आश्वासित प्रगती योजना, कॅशलेस मेडिक्लेम योजना, निवड वेतनश्रेणी, रिक्त पदांची भरती, पीएफ अंमलबजावणी, कला व क्रीडा शिक्षकांच्या आणि समुपदेशक पदांची पुनर्स्थापना तसेच रात्रशाळांना पूर्णवेळ शाळांचा दर्जा देणे यांचा समावेश होता. विशेष सत्रात स्वामी भक्तीप्रिय स्वामी यांनी ‘अध्यात्मातून शास्त्राकडे’ या विषयावर प्रेरणादायी विचार मांडले. त्यांच्या सत्राने उपस्थित शिक्षकांमध्ये नवचैतन्य निर्माण केले.
कार्यक्रमानंतर अनेक शिक्षकांनी समाधान व्यक्त करीत डॉ. कडणे यांच्या कार्यक्षम आयोजनाचे कौतुक केले. सुहास बांदेकर (साधना विद्यालय) आणि भगवान सागर (नाथ पै विद्यालय) यांनी त्यांच्या नेतृत्वगुणांची प्रशंसा केली. कार्यक्रमाच्या समारोपात आमदार दरेकर यांनी सांगितले, की हे संमेलन युवा शिक्षकांच्या विचारांना दिशा देणारे ठरेल आणि त्यांच्या व्यक्तिमत्त्वावर सकारात्मक प्रभाव टाकेल. खच्चून भरलेल्या सभागृहातील या अधिवेशनाला आमदार शाम सावंत, डॉ. गजानन रत्नपारखी, पराग शैक्षणिक संकुलाचे संचालक बाळकृष्ण बने, राजेश सातघरे, संजय पितळे, मनीष शाह, मंगल शाह, डॉ. शिवम सिंग आदी मान्यवर प्रमुख पाहुणे म्हणून उपस्थित होते.