अनधिकृत इमारतीचा वीज पुरवठा खंडीत करण्यासाठी महावितरणला पत्र

अनधिकृत इमारतीचा वीजपुरवठा खंडित करण्यासाठी महावितरणला पत्र
तुर्भे, ता. ३१ (बातमीदार) ः नवी मुंबई महापालिकेच्या घणसोली येथील राखीव असलेल्या मोकळ्या भूखंडावर अतिक्रमण करून एका भूमाफियाने अनधिकृत इमारत उभी केली. हे अनधिकृत बांधकाम निष्काषित करण्याचे निर्देश उच्च न्यायालयाने दिले आहेत. त्‍यानुसार या इमारतीचा वीजपुरवठा खंडित करण्यात यावा, असे पत्र नवी मुंबई महापालिकेने महावितरणच्या घणसोली विभागाला दिल्याने एकच खळबळ उडाली आहे.
घणसोलीमधील एका अनधिकृत बांधकामासंदर्भात पालिका विभाग कार्यालय व नवी मुंबई पालिकेच्या अतिक्रमण नियंत्रण विभागाकडे माजी नगरसेवक प्रशांत पाटील यांनी पत्रव्यवहार केला होता. दरम्यान, यावर कारवाई न झाल्याने प्रशांत पाटील यांनी नवी मुंबई महापालिकेविरोधात १९ डिसेंबर २०२४ रोजी रिट याचिका दाखल केली होती. या याचिकेसंदर्भात १९ डिसेंबर २०२४ रोजी ए. एस. गडकरी व कमल खटाजे यांच्या खंडपीठासमोर सुनावणी झाली असता, पालिकेला अनधिकृत बांधकामावर कारवाई करण्याचे निर्देश दिले होते. त्याप्रमाणे नवी मुंबई महापालिकेने पुढील रीतसर कारवाई करीत या अनधिकृत इमारतीचा विद्युत पुरवठा खंडित करण्यासाठी २९ मार्च २०२५ रोजी महावितरणच्या घणसोली कार्यालयात पत्र दिले होते. मात्र वीजपुरवठा खंडित झाला नसल्याने पालिकेने दुसरे पत्र १७ मे रोजी उप अभियंता (विद्युत) घणसोली विभाग यांना दिले आहे. या वेळी उच्च न्यायालयाच्या आदेशानुसार संबंधित इमारतीचा वीजपुरवठा तत्काळ खंडित करण्यात यावा, असे नवी मुंबई महापालिकेने नमूद केले आहे. त्‍यामुळे रहिवाशांमध्ये खळबळ माजली आहे.