धुळीच्या रस्त्याना आता पावसाचाच सहारा

धुळीच्या रस्त्यांना आता पावसाचा ‘सहारा’
धूळ नियंत्रण मशीन फिरतेय दुसरीकडेच
दिखाव्याच्या कामाने नागरिक हैराण
सकाळ वृत्तसेवा
डोंबिवली, ता. १ ः ऊन-पावसाचा खेळ सुरू असल्याने पालिका हद्दीत बहुतांश रस्ते चिखलमय झाले आहेत. शहरात गृहनिर्माण प्रकल्पांची कामे आणि रस्ते, गटारांची कामे जोरात सुरू आहेत. यामुळे वायू प्रदूषण होत असून, धुळीने माखलेल्या रस्त्यांनी प्रवासी बेजार झाले आहेत. हवेची गुणवत्ता पातळी सुधारण्यासाठी पालिकेने धूळ संयंत्र नियंत्रण मशीन आणले, मात्र हे मशीन शहराच्या बाहेरील भागात फिरते. शहरांत ते फिरवलेच जात नसल्याने नागरिकांमध्ये नाराजीचे वातावरण आहे. बहुतांश रस्ते हे धुराळ्याने बरबटलेले असून, आता या रस्त्यांना स्वच्छ होण्यासाठी पावसाची वाट पाहावी लागणार आहे.
कल्याण-डोंबिवली महापालिका क्षेत्रात मोठ्या प्रमाणात गृहसंकुलांची उभारणी होत आहे. तसेच, सिमेंट काँक्रीटीकरणाची कामे, गटारांची बांधणी यासोबतच महानगर गॅस पाइपलाइन, सेवावाहिन्या, जलवाहिन्या टाकण्याची कामे सुरू आहेत. आगामी पालिका निवडणुकीच्या पार्श्वभूमीवर पाऊस सुरू झाला तरी ही कामे थांबविण्यात आली नसून ती सुरूच आहेत. यामुळे जागोजागी रस्ते खोदले असून, रस्त्यांच्या कडेला माती, खडी, सिमेंटच्या डेब्रिजचे ढिगारे टाकण्यात आले आहेत. वाहनांच्या वर्दळीमुळे हे साहित्य रस्त्यावर पसरते, तर कोठे पेव्हर ब्लॉक टाकल्यानंतर त्यांची झाडलोट झालेली नाही. त्यामुळे बारीक खडी, सिमेंट हे रस्त्यावर पसरले आहेत. सध्या ऊन-पावसाच्या खेळामुळे रस्त्यावर चिखलसदृश परिस्थिती झाली आहे. त्यावरून वाहने घसरण्याचे प्रमाण वाढत आहे. यामुळे आता जोरदार पावसाची प्रतीक्षा नागरिकांना लागली आहे. रस्ते असे नीट होणार नाहीत, ते पावसाने तरी धुतले जातील, अशी आशा केली जात आहे.

हवेची गुणवत्ता पातळी सुधारण्यासाठी, वायू प्रदूषण कमी करण्यासाठी धूळ संयंत्र नियंत्रण मशीन कोट्यवधी रुपये खर्च करून खरेदी केले आहे. डोंबिवलीतील हे मशीन ९० फिट रोड, एमआयडीसीतील रस्ता, रेल्वे समांतर रस्ता आदी रस्त्यांवर फिरताना दिसले, मात्र शहरातील रस्त्यांवर ते कधीही फिरताना दिसले नाही. एमआयडीसी परिसरात सध्या हे मशीन फिरत असून, कधी रस्त्यांवर, तर कधी हवेत पाण्याचा फवारा करणारे मशीन सुरू आहेत. यामुळे नक्की प्रशासन यातून काय काम करत आहे, असा सवाल उपस्थित केला जात आहे.

...म्हणून शहरात मशीन आणता येत नाही
शहरातील रस्ते अरुंद असल्याने या रस्त्यांवर हे मशीन आणता येत नसल्याचे पालिका अधिकाऱ्यांचे म्हणणे आहे, मात्र मशीन खरेदी करताना याची कल्पना अधिकाऱ्यांना नव्हती का? जर होती तर कोट्यवधी रुपये त्यावर खर्चच का केले गेले, रात्री किंवा पहाटे लवकर वाहनांची वर्दळ नसेल तेव्हा हे मशीन शहरातील अंतर्गत रस्त्यांवर फिरू शकते, मात्र ते का फिरवले जात नाही, असा सवाल जागरूक नागरिक करत आहेत.