साकुर्लीच्या ग्रामस्थांना बिबट्याचे दर्शन

साकुर्लीच्या ग्रामस्थांना बिबट्याचे दर्शन
किन्हवली, ता. २ (बातमीदार) : शहापूर तालुक्यातील डोळखांब वन परिक्षेत्रातील डेहणे-आजोबा तीर्थक्षेत्र परिसरात साकुर्लीच्या ग्रामस्थांना रविवारी (ता. १) बिबट्याचे दर्शन झाले. त्यामुळे जंगल परिसरात फिरताना नागरिकांनी सावधानता बाळगावी, असे आवाहन वन विभागाने केले आहे.

डोळखांब वन परिक्षेत्राचे भौगोलिक क्षेत्रफळ १० हजार ५०० हेक्टरपर्यंत विस्तारले आहे. ठाणे व अहिल्यानगर जिल्ह्याच्या हद्दीपर्यंत घनदाट राखीव वनक्षेत्र आहे. वाल्मीक ऋषींची समाधीस्थळ असलेल्या आजोबा पर्वत परिसरात अनेक हिंस्त्र श्वापदांचा संचार असतो. रविवारी सायंकाळी साकुर्ली येथील ग्रामस्थ अरुण अधिकारी व भाई अधिकारी हे डेहणे - आजोबा पर्वत रस्त्यावरून प्रवास करत असताना रस्त्याच्या कडेला एका मातीच्या धक्क्यावर बिबट्या दिसला होता. त्यांनी लागलीच वन अधिकाऱ्यांना याची कल्पना दिली. तसेच चोंढे परिसरात अजून एक बिबट्या फिरत असल्याची माहिती त्यांनी दिली. यंदा मे महिन्यात २० ते २२ दिवस मुसळधार पाऊस झाल्याने कंदमुळे, रानभाज्या उगवल्या आहेत. अनेक महिला, नागरिक रानभाज्या आणण्यासाठी जंगलात जात असतात. त्यामुळे जंगल परिसरात फिरताना नागरिकांनी सावधानता बाळगावी, असे आवाहन वन अधिकाऱ्यांनी केले आहे.

पथनाट्याद्वारे जनजागृती
डोळखांब वन परिक्षेत्रात अनेक दिवसांपासून बिबट्याचा मुक्त संचार आहे. खबरदारी कशी घ्यावी यासाठी वारंवार गाव बैठका घेतल्या आहेत. पथनाट्याद्वारे, मार्गदर्शक सूचनाफलक लावून जनजागृती केली आहे, अशी माहिती डोळखांबचे वन परिक्षेत्र अधिकारी अजय चव्हाण यांनी दिली.