पोलिसांच्या निष्क्रियतेविरोधात मंगळवारी (आज) ‘प्रहार’चा ठिय्या!

पोलिसांच्या निष्क्रियतेविरोधात आज ‘प्रहार’चा ठिय्या
उल्हासनगर पोलिस उपायुक्त कार्यालयावर जनआक्रोशाचा उद्रेक होणार
उल्हासनगर, ता. २ (वार्ताहर) : पोलिसांचं काम जनतेला सुरक्षा देणं की गुन्हेगारांना मोकळं रान देणं, हा सवाल घेऊन प्रहार जनशक्ती पक्षाचे सैनिक मंगळवारी (ता. ३) सकाळी ११ वाजता उल्हासनगर परिमंडळ-४ येथील पोलिस उपायुक्त कार्यालयावर ठिय्या आंदोलन करणार आहेत.
अवैध धंद्यांना अभय, पोलिस कर्मचाऱ्यांचा खंडणीमध्ये सहभाग, दिव्यांगांवरील अत्याचार, गुन्हेगार मोकाट आणि पोलिस खात्याचा मौन अशा एक ना अनेक कारणांवर हे आंदोलन उभारले जात आहे. हे केवळ निवेदन देण्यापुरते आंदोलन नसून प्रशासनाच्या झोपलेल्या व्यवस्थेला जागं करण्याचा हा तीव्र प्रयत्न असल्याचे प्रहार जनशक्ती संघटनेचे ठाणे जिल्हाध्यक्ष ॲड. स्वप्नील पाटील यांनी स्पष्ट केले आहे.