डेब्रिजमुळे खारफुटीसह जैवविविधता धोक्यात

उरण, ता. २ (वार्ताहर) ः तालुक्यातील खाडीकिनारी खारफुटीसह मुबलक प्रमाणात जैवविविधता आढळते, मात्र काही दिवसांपासून गोदाममालक तसेच व्यावसायिकांकडून मोठ्या प्रमाणात डेब्रिज, मातीचा भराव करण्यात आल्‍याने पाणथळ क्षेत्र, खारफुटी धोक्‍यात आली आहे, शिवाय खाडीकिनाऱ्यालगत गावांत पूरस्‍थिती निर्माण होण्याची भीती असल्‍याने स्‍थानिक चिंतेत आहेत.
उरण तालुक्यातील चिर्ले, वेश्वी, दिघोडे, विंधणे, पागोटे, नवघर, खोपटा, धुतूम, सोनारी, करळ, जासई, बोकडविरा, नवीन शेवा, चाणजे, सोनारी, जसखार, नवघर, पाणजेसह इतर गावालगतच्या खाडीकिनारी खारफुटीवर काही बांधकाम व्यावसायिकांकडून डेब्रिज, माती, मुरूम टाकले जात आहे. त्‍यामुळे फ्लेमिंगोसह इतर स्‍थलांतरित पक्ष्यांचा अधिवास धोक्‍यात आला आहे, शिवाय पाणथळ क्षेत्रही बाधित होत आहे. यासंदर्भात पर्यावरणप्रेमींनी वन विभागाकडे तक्रार दाखल केली आहे, मात्र त्‍याकडे दुर्लक्ष झाल्‍याने पाणथळ क्षेत्रात बेकायदा भरावाचे प्रमाण दिवसेंदिवस वाढत असल्‍याचे नागरिकांचे म्‍हणणे आहे.

उरणमधील कांदळवनाचे काही क्षेत्र वन विभागाकडे वर्ग केले आहे. त्यासाठी आम्‍ही सुरक्षा पुरवली आहे. तरीही कोणी भराव टाकत असेल, तर नक्‍की कारवाई केली जाईल.
- समीर शिंदे, वन अधिकारी, कांदळवन विभाग

उरण ः खारफुटीच्या जंगलात डेब्रिज टाकले जात आहे.