समुपदेशनानंतर महसूलमधील १७७ जणांच्या बदल्‍या

अलिबाग, ता. ३ (बातमीदार) ः महसूल प्रशासनामध्ये प्रथमच समुपदेशन पद्धतीने तलाठी, मंडळ अधिकारी, सहाय्यक लिपिक, अधिकारी अशा एकूण १७७ जणांच्या बदल्यांची प्रक्रिया नुकतीच पार पडली. नियोजन भवनात जिल्‍हाधिकारी, उपायुक्त, विभागीय आयुक्तांचे प्रतिनिधी, निवासी उपजिल्हाधिकारी यांच्या समितीसमोर हा बदल्यांचा कार्यक्रम घेण्यात आला. यात ज्येष्ठ कर्मचाऱ्यांना प्राधान्य देण्यात आले. सरकारने निर्गमित केलेल्या सूचनांच्या अनुषंगाने प्रशासकीय बदल्यांना पात्र असणाऱ्या सर्व कर्मचाऱ्यांना बैठकीला बोलावण्यात आले होते.
महसूल विभागामध्ये तलाठी तथा ग्राममहसूल अधिकारी यांच्या ६९ जणांच्या बदल्या करण्याचे नियोजन होते. यापैकी सहा वर्षे पूर्ण झालेल्‍या ४७ जणांच्या बदल्या करण्यात आल्‍या. आधी ज्‍या तालुक्यात काम केले आहे, तिकडे बदली न देता दुसऱ्या तालुक्यात बदली देण्यात आली आहे, मात्र या वेळी त्‍यांच्या पसंतीला प्राधान्य देण्यात आले, तर तीन वर्षांपेक्षा जास्त कार्यकाळ एकाच पदावर असणाऱ्या २७ जणांना त्यांच्या सजामधील दुसऱ्या ठिकाणी बदली देण्यात आली आहे.
सहाय्यक महसूल अधिकारी तथा अव्वल कारकून ४४ बदलीस पात्र होते, तर लिपिकपदासाठी ६२ जणांच्या बदल्या अपेक्षित होत्‍या. त्‍या पैकी बहुतांश जणांना पसंतीप्रमाणे बदल्या देण्यात आल्या आहेत.

समुपदेशन प्रकियेमध्ये बदलीस पात्र असणाऱ्या कर्मचाऱ्याला समोर बोलावले जाते. त्यांना त्यांच्या पसंतीनुसार ठिकाण निवडण्याचा अधिकार दिला जातो. यामुळे कोणीही नाराज होत नाही. सर्व प्रकिया पार पडल्यानंतर त्याच दिवशी त्यांना मेलद्वारे ऑर्डर देण्यात आली आहे.
- किशन जावळे, जिल्ह्याधिकारी