अलिबाग आगारात महामंडळाचा वर्धापनदिन उत्साहात

अलिबाग आगारात महामंडळाचा वर्धापनदिन उत्साहात
अलिबाग, ता. २ (वार्ताहर) ः महाराष्ट्र राज्य परिवहन महामंडळाचा ७७ वा वर्धापनदिन रविवारी (ता. १) साजरा करण्यात आला. यानिमित्ताने अलिबाग एसटी आगारात प्रवाशांना गुलाबपुष्प देऊन तसेच केक कापून कर्मचारी व प्रवाशांना शुभेच्छा देण्यात आल्या.
एसटी महामंडळ रायगड विभागाचे वाहतूक अधिकारी प्रशांत खरे यांच्या प्रमुख उपस्थितीत वर्धापनदिन साजरा झाला. या वेळी अलिबाग एसटी आगारातील व्यवस्थापक चेतन देवधर, राकेश देवरे, स्थानकप्रमुख अभिजित मांढरे, वाहतूक निरीक्षक, कार्यशाळा विभागाचे अधिकारी कर्मचारी, चालक, वाहक व महिला कर्मचारी, प्रवासी उपस्थित होते. एसटी महामंडळाच्या वर्धापनदिनानिमित्त संपूर्ण स्थानकाचा परिसर सुशोभित करण्यात आला होता. अलिबाग एसटी बस आगारात रांगोळी काढण्यात आली होती. त्यानंतर पंढपूरला जाणाऱ्या एसटी बसला फुलांनी सजविण्यात आले. या वेळी एसटी बसची पूजा करण्यात आली. ठिकठिकाणी फुलांच्या माळा लावून परिसर सुशोभित करण्यात आला होता. त्यानंतर प्रवाशांच्या हस्ते केक कापून वर्धापनदिन साजरा केला. विभागीय वाहतूक अधिकारी प्रशांत खरे, आगार व्यवस्थापक राकेश देवरे, चेतन देवधर तसेच महिला कर्मचारी यांच्या हस्ते प्रवाशांना गुलाबपुष्प व पेढे देऊन एसटी महामंडळाचा वर्धापनदिन साजरा करण्यात आला.