रोह्यात घरफोडीची मालिका सुरूच
रोह्यात घरफोडीची मालिका सुरूच
किमती दागिन्यांसह दोन कोरे चेक घेऊन चोरटे पसार
रोहा, ता. २ (बातमीदार) ः शहरापासून जवळ असलेल्या भुवनेश्वर येथे दोन घरांमध्ये घरफोडी करून चोरट्यांनी दोन लाख ६५ हजार रुपये किमतीचे सोने, चांदीचे दागिने तसेच सह्या केलेले दोन कोरे चेक चोरून पोबारा केल्याची घटना घडली आहे. यामुळे परिसरात नागरिकांमध्ये भीतीचे वातावरण आहे.
रोहे शहरात मागील चार महिन्यांपासून चोरी आणि घरफोडीच्या घटना वारंवार घडत आहेत. तीन महिन्यांपूर्वी सहा ठिकाणी झालेल्या घरफोडी घटनेतील आरोपींचा छडा लावण्यात रोहा पालिसांना यश आले. त्यानंतर काही काळ शांततेत गेल्यावर चोरट्यांची टोळी पुन्हा सक्रिय झाल्याने नागरिकांमध्ये भीतीचे वातावरण पसरले आहे. या चोरीच्या घटनेमुळे शहरात खळबळ उडाली आहे. भुवनेश्वर येथील श्रीकृष्णा नगरमधील निरलोन कॉलनी येथील ऋतुजा राजेश मोरे या सुट्टीनिमित्ताने आपल्या माहेरी गेल्या असताना २० ते ३१ मेदरम्यान चोरट्यांनी बंद घराचे कुलूप तोडून त्यावाटे घरात प्रवेश केला. यानंतर घरातील सोने, चांदीचे किमती दागिने लंपास केले. त्यानंतर चोरट्यांनी आपला मोर्चा शेजारी राहणाऱ्या सिद्धी शिंदे यांच्या घरावर नेत तेथीलही सोन्याचे किमती दागिने व दोन सही केलेले कोरे धनादेश घेऊन चोरट्यांनी पोबारा केला. या घटनेची माहिती पोलिसांना देण्यात आली. याबाबत रोहा पोलिस ठाण्यात ऋतुजा मोरे यांनी फिर्याद दिली असून, पोलिस निरीक्षक मारुती पाटील यांच्या मार्गदर्शनाखाली पोलिस हवालदार श्रीधर अधिकारी पुढील तपास करीत आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.