म्हाडाच्या संभाजीनगरमधील भूखंडांसाठी प्रक्रिया सुरू

म्हाडाच्या संभाजीनगरमधील भूखंडांसाठी प्रक्रिया सुरू
८ जुलै रोजी ई-लिलावाचा निकाल
सकाळ वृत्तसेवा
मुंबई, ता. ३ : म्हाडाच्या छत्रपती संभाजीनगर मंडळाच्या अखत्यारीतील ५३ अनिवासी भूखंडांच्या विक्रीसाठी आयोजित केलेल्या ई-लिलावासाठी ऑनलाइन नोंदणी व अर्ज प्रक्रियेला सोमवारी (ता. २) सुरुवात झाली. म्हाडा उपाध्यक्ष तथा मुख्य कार्यकारी अधिकारी संजीव जयस्वाल यांच्या हस्ते गो लाइव्ह कार्यक्रमांतर्गत या प्रक्रियेला प्रारंभ करण्यात आला.
संभाजीनगर मंडळातील अनिवासी भूखंडांच्या ई-लिलावामार्फत विक्रीसाठी जाहिरात प्रसिद्ध करण्यात आली आहे. ई-लिलाव प्रक्रियेत भाग घेण्यासाठी www.eauction.mhada.gov.in संकेतस्थळावर नोंदणी करणे, ऑनलाइन अर्ज करणे, कागदपत्रे अपलोड करणे, अनामत रक्कम ऑनलाइन भरणे यासाठी १ जुलै रोजी रात्री ११.५९ वाजेपर्यंत मुदत देण्यात आली आहे. ई-लिलावासाठी आरटीजीएस, एनईएफटीद्वारे अनामत रकमेचा भरणा २ जुलै रोजी संबंधित बँकेच्या कार्यालयीन वेळेपर्यंत करता येणार आहे. ७ जुलै रोजी सकाळी ११ वाजेपासून सायंकाळी ५ वाजेपर्यंत संगणकीय प्रणालीमध्ये पात्र ठरलेल्या अर्जदारांसाठी ऑनलाइन बोली स्वरूपातील ई-लिलाव www.eauction.mhada.gov.in या संकेतस्थळावर होणार आहे, तर ८ जुलै रोजी सकाळी ११ वाजता https://mhada.gov.in व www.eauction.mhada.gov.in या दोन्ही संकेतस्थळांवर ई-लिलावाचा एकत्रित निकाल जाहीर करण्यात येणार आहे.
वांद्रे पूर्व येथील म्हाडाच्या मुख्यालयात झालेल्या या कार्यक्रमाला म्हाडाचे मुख्य अभियंता धीरजकुमार पंदीरकर, संभाजीनगर मंडळाचे मुख्य अधिकारी शिवकुमार आवळकंठे दूरदृष्य प्रणालीद्वारे उपस्थित होते.