केडीएमसीतील वैद्यकीय अधिकाऱ्यांच्या बदल्या

वैद्यकीय अधिकाऱ्यांच्या तडकाफडकी बदल्या
महापालिका आयुक्तांचा निर्णय
सकाळ वृत्तसेवा
डोंबिवली, ता. ३ : कल्याण-डोंबिवली पालिकेच्या वैद्यकीय अधिकाऱ्यांच्या पालिका आयुक्त अभिनव गोयल यांनी सोमवारी (ता. १) तडकाफडकी बदल्या केल्या आहेत. पालिकेची रुग्णालये, नागरी आरोग्य केंद्रांमध्ये रुग्णसेवा देण्याऐवजी पालिका मुख्यालयातील वैद्यकीय विभागातील निविदा प्रक्रिया, बाह्यस्रोत नोकर भरती, रुग्णालयांचे नूतनीकरण आणि इतर प्रशासकीय कामांत अधिकारी वेळ घालवत असल्याने या बदल्या केल्याचे म्हटले जात आहे. बदली वैद्यकीय अधिकाऱ्यांनी तातडीने आपल्या कामाच्या ठिकाणी हजर होण्याचे निर्देश पालिका आयुक्त गोयल यांनी दिले आहेत.

कल्याण-डोंबिवली महापालिकेचा आरोग्य विभाग हा संवेदनशील असल्याने वैद्यकीय विभागातील बदल्यांकडे फारसे लक्ष दिले जात नव्हते. गेल्या दोन महिन्यांच्या काळात पालिका रुग्णालयांत घडलेल्या गैरप्रकारांमुळे आयुक्त अभिनव गोयल यांनी वैद्यकीय विभागाचे दोन महिने निरीक्षण केले. या विभागात वर्षानुवर्ष एकाच जागी असलेल्या वैद्यकीय अधिकारी, कर्मचाऱ्यांना हटविणे गरजेचे असल्याचे आयुक्तांच्या निदर्शनास आले. याशिवाय वैद्यकीय विभागाचे उपायुक्त प्रसाद बोरकर यांच्याकडेही काही जाणकारांनी वैद्यकीय मुख्यालयातील अधिकाऱ्यांची बदली होणे महत्त्वाचे आहे, याविषयी तक्रारी केल्या होत्या.

अनागोंदी कारभार
पालिका मुख्यालयातील वैद्यकीय अधिकारी पालिका रुग्णालय, आरोग्य केंद्रांमध्ये रुग्णसेवा देण्याऐवजी मुख्यालयातील वैद्यकीय साधन सामग्रीच्या निविदा प्रक्रिया, ठेकेदार नियुक्ती, बाह्यस्रोत कर्मचारी नियुक्तीच्या पार पाडणे, यात व्यस्त राहात होते. पालिका रुग्णालये, आरोग्य केंद्रांमध्ये वैद्यकीय अधिकाऱ्यांची गरज आहे, याची त्यांना फिकीर नव्हती. मागील दोन वर्षांत वैद्यकीय विभागात सर्वाधिक अनागोंदी माजली होती. पालिकेची वैद्यकीय सेवा सुस्थितीत चालवायची असेल, तर मुख्यालयात वैद्यकीय अधिकाऱ्यांना बदलणे खूप गरजेचे आहे हे आयुक्त गोयल यांच्या निदर्शनास आले. त्यानुसार आयुक्तांनी या अधिकाऱ्यांच्या बदल्या करून तेथे नवे वैद्यकीय अधिकारी नियुक्त केले आहेत.

बदली झालेले अधिकारी
पालिका मुख्यालयात क्षयरोग विभागातील डॉ. विनोद दौंड यांची डोंबिवलीतील शास्त्रीनगर रुग्णालय, साथरोग नियंत्रण अधिकारी डॉ. प्रतिभा पानपाटील यांची डोंबिवलीतील मढवी आरोग्य केंद्रात, मुख्यालय आरोग्य विभागातील डॉ. समीर सरवणकर यांची कल्याणमधील रुक्मिणीबाई रुग्णालयात बदली केली आहे. मढवी आरोग्य केंद्रातील डॉ. पौर्णिमा ढाके, शास्त्रीनगर रुग्णालयातील डॉ. संदीप मुकणे, रुक्मिणीबाई रुग्णालयाच्या मुख्य वैद्यकीय अधिकारी डॉ. प्रज्ञा टिके यांची पालिका मुख्यालयात नियुक्ती केली आहे. वसंत व्हॅली रुग्णालयातील डॉ. सपना रेपाळे यांच्याकडे मुख्य वैद्यकीय अधिकारीपदाचा पदभार सोपविला आहे.