केडीएमसीतील ठेकेदारांच्या मुदतवाढीला चाप

केडीएमसीतील ठेकेदारांच्या मुदतवाढीला चाप
पालिका आयुक्तांचा निर्णय
सकाळ वृत्तसेवा
डोंबिवली, ता. ३ : कल्याण-डोंबिवली महापालिका हद्दीतील विविध कामांसाठी पालिकेच्या अनेक विभागांतून त्या कामाची निविदा प्रक्रिया राबवत ठेकेदार नियुक्त केले जातात. ठेकेदाराची निविदेची मुदत संपली अथवा ठेकेदाराचे विहित वेळेत काम पूर्ण झाले नाही, की त्या विभागाकडून ठेकेदारांना मुदतवाढ देण्याचा प्रस्ताव आयुक्तांकडे दाखल केला जातो. ही पद्धत चुकीची असून ठेकेदारांची मुदतवाढीवर पालिका आयुक्तांनी चाप आणला आहे. ठेकेदाराची मुदत संपण्याच्या एक महिना आधी नवीन ठेकेदार नियुक्तीचे प्रस्ताव दाखल करावेत, अन्यथा जबाबदार अधिकाऱ्यांवर कारवाई केली जाईल, असा इशारा पालिका आयुक्त अभिनव गोयल यांनी पालिकेतील सर्व विभागप्रमुखांना दिला आहे.

कल्याण-डोंबिवली पालिकेतील बहुतांशी ठेकेदार हे पालिकेतील अधिकारी, ठेकेदार यांच्या आशीर्वादाने काम करतात. मागील २० ते २५ वर्षांपासून ठरावीक कर्मचारी हे ठरावीक विभागात काम करीत आहेत. विशेषत: बांधकाम, लेखा अभियांत्रिकी, लेखा विभाग, सामान्य प्रशासन, नगररचना विभाग, मलजलनिस्सारण, वैद्यकीय विभाग, महिला आणि बालकल्याण, समाजविकास विभागात असे कर्मचारी अधिक संख्येने आहेत. अशा विभागांत ठाण मांडून असलेल्या कर्मचाऱ्यांच्या आशीर्वादाने काही ठरावीक ठेकेदार त्या-त्या विभागातील देखभाल दुरुस्ती, बांधकामाची कामे निविदांच्या माध्यमातून मिळविण्यात यशस्वी होत आहेत. याविषयी अनेक तक्रारी यापूर्वीच पालिकेकडे दाखल आहेत. अधिकारी या सगळ्या प्रकरणात सामील असल्याने अशा ठेकेदारांवर, कर्मचारी, अधिकाऱ्यांवर कधीही प्रशासनाकडून कारवाई करण्यात येत नाही, असे सांगण्यात येते.

कल्याण-डोंबिवली पालिकेत विविध विभागांकडून ठेकेदार वार्षिक, द्विवार्षिक देखभाल, दुरुस्तीची कामे पदरात पाडून घेतात. घेतलेली कामे विहित वेळेत ते पार पाडत नाहीत किंवा त्या ठेकेदाराच्या निविदेची मुदत संपुष्टात आलेली असते. अशा ठेकेदारांचे संबंधित विभागातील अधिकाऱ्यांकडून मुदतवाढीसाठी प्रस्ताव आयुक्तांकडे दाखल केले जातात. ही बाब आयुक्त गोयल यांच्या निदर्शनास आल्यावर त्यांनी पालिकेत काम करणाऱ्या कोणत्याही विभागातील ठेकेदाराचा निविदेचा कालावधी संपुष्टात येण्यापूर्वी एक महिना आधी नवीन ठेकेदार निश्चित करण्यासाठी हालचाली सुरू कराव्यात, असे आदेश आयुक्त गोयल यांनी पालिकेतील सर्व विभागप्रमुखांना दिले आहेत.

दिरंगाई केल्यास कारवाई
कार्यवाहीत संबंधित विभागप्रमुख, कार्यकारी अभियंता यांनी हयगय केली, तर त्यांना या दिरंगाईला जबाबदार धरून त्यांच्यावर कारवाई करण्याचा इशारा आयुक्त गोयल यांनी दिला आहे. सर्व विभागप्रमुखांनी या आदेशाचे पालन करावे, तसेच या संबंधीचे नियोजन करून ते आपल्या निदर्शनास आणण्याचे आदेश आयुक्तांनी दिले आहेत.