घोडबंदर रस्त्यावर स्वच्छता मोहीम

सकाळ वृत्तसेवा
ठाणे, ता. ३ : महापालिकेकडून घोडबंदर रस्त्यावर दोनदिवसीय स्वच्छता मोहीम राबवण्यात आली. या मोहिमेत माजिवडा-मानपाडा प्रभाग समितीअंतर्गत घोडबंदर रोडवर दुतर्फा सर्वंकष स्वच्छता मोहीम करण्यात येणार आहे.
कापूरबावडी ते पातलीपाडा, पातलीपाडा ते हायपर सिटी, हायपर सिटी ते नागला बंदर, नागला बंदर ते गायमुख असे या रस्त्याचे चार विभाग करण्यात आले असून, त्या प्रत्येक विभागासाठी समन्वयक अधिकारी नियुक्त केला आहे. प्रत्येक विभागासाठी समन्वयक अधिकाऱ्यासोबत सहाय्यक आयुक्त, आरोग्य अधिकारी, कार्यकारी अभियंता, उपअभियंता, उपमुख्य स्वच्छता निरीक्षक, स्वच्छता निरीक्षक, कनिष्ठ अभियंता आणि स्वच्छता कर्मचारी नियुक्त करण्यात येणार आहे. तसेच घोडबंदर रोडच्या स्वच्छतेवर लक्ष केंद्रित करण्यात आले आहे. या मोहिमेत, मुख्य रस्ता, सेवा रस्ता, दुभाजक या ठिकाणी कचरा काढणे, डेब्रिज उचलणे, दुभाजक स्वच्छ करणे, नाले आणि गटारातील गाळ उचलणे, रस्त्याची साइडपट्टी स्वच्छ करणे, झाडांच्या कापलेल्या फांद्या उचलणे आदी कामे करण्यात येणार असल्याची माहिती अतिरिक्त आयुक्त प्रशांत रोडे यांनी दिली.
..................................
५०० सफाई कामगारांचा सहभाग
या मोहिमेत महापालिकेच्या घनकचरा व्यवस्थापन विभागासोबत, उद्यान विभाग, सार्वजनिक बांधकाम विभाग, प्रभाग समिती, एमएमआरडीए, एमएसआरडीसी, मेट्रो यांनीही सहभाग घेतला आहे. सुमारे ५०० सफाई कामगार, १५ डम्पर, यांत्रिक सफाईच्या मशीन वापरले जाणार आहे.
.................................
समन्वयक म्हणून नेमणूक
घोडबंदर रोडवर स्वच्छता मोहिमेचे उपायुक्त मनीष जोशी, दिनेश तायडे, उपनगर अभियंता विकास ढोले आणि सुधीर गायकवाड यांच्यावर समन्वयाची जबाबदारी असून, आरोग्य अधिकारी डॉ. राणी शिंदे, माजिवडा-मानपाडा प्रभाग समितीच्या सहाय्यक आयुक्त सोनल काळे यांच्यासह अधिकारी आणि कर्मचारी नेमून दिलेल्या विभागातील सर्वंकष स्वच्छता अभियानात सहभागी झाले आहेत.