गृहसंकुलातील ओला कचरा प्रकल्प बंद

ओला कचऱ्यावरून तंबी
गृहसंकुलांना कायदेशीर कारवाईचा इशारा
सकाळ वृत्तसेवा
ठाणे, ता.४ : पालिका हद्दीतील कचराप्रश्न मार्गी लावण्यासाठी पालिका प्रशासन विविध उपाययोजना करीत आहेत. अशातच ज्या गृहसंकुलांनी ओला कचरा प्रकल्प दाखवून वापर परवाना (ओसी) घेतला अशा ७५ इमारतींमधील प्रकल्पांची पालिकेकडून झाडाझडती घेण्यात येणार आहे. तसेच बंद असलेल्या प्रकल्पांवर कायदेशीर कारवाईचा इशारा पालिकेने दिला आहे.
ठाणे पालिका क्षेत्रात गेल्या काही महिन्यांपासून कचऱ्याचा प्रश्न गंभीर झाला आहे. अशातच आतकोली येथे राज्य शासनाकडून पालिकेला कचरा प्रकल्पासाठी जागा उपलब्ध झाली असून त्याठिकाणी प्रकल्प सुरु करण्यात आला आहे. त्यामुळे शहरातील कचरा समस्या मार्गी लागण्यास सुरुवात झाली आहे. अशातच आता, पालिका प्रशासनाने पालिका हद्दीत निर्माण होणाऱ्या कचऱ्यापैकी ६० टक्के कचरा ओला कचरा असून उर्वरित कचरा हा सुका व इतर स्वरूपाची आहे. या कचऱ्याची विल्हेवाट लावणे महापालिकेला शक्य झालेले नाही. दुसरीकडे घनकचरा अधिनियमन २०१६ ची अंमलबजावणीसाठी पालिकेने पावले उचलली आहेत. त्यानुसार मोठ्या गृहसंकुलांनी ओल्या कचऱ्याची विल्हेवाट त्याच ठिकाणी लावावी, असे निश्चित करण्यात आले आहे. तसेच प्रकल्प असलेल्या इमारतींनाच ओसी दिली जाणार नसल्याचे पालिकेने स्पष्ट केले होते.
................................
पुढील आठवड्यात महापालिकेच्या घनकचरा विभागाकडून ७५ इमारतींचा सर्वेक्षण सुरु होणार आहे. या पाहणी दौऱ्यात गृहसंकुलाच्या ठिकाणी ओल्या कचऱ्यावरील प्रक्रिया प्रकल्प कार्यान्वित नसल्याचे आढळून आल्यास त्यांच्यावर कायदेशीर कारवाई करण्यात येईल.
- मनीष जोशी, उपायुक्त, घनकचरा विभाग, ठाणे