३० गावांमधील शेतकऱ्यांशी शास्त्रज्ञांचा संवाद

ठाणे, ता. ३ (बातमीदार)ः महाराष्ट्र पशू व मत्स्य विज्ञान विद्यापीठ (माफसू)अंतर्गत कृषी विज्ञान केंद्र, ठाणे आणि मुंबई पशुवैद्यकीय महाविद्यालय यांच्या संयुक्त विद्यमाने विकसित कृषी संकल्प अभियान २९ मे ते १२ जूनदरम्यान ठाणे जिल्ह्यातील सहा तालुक्यांमध्ये राबवले जात आहे. या अभियानात केवळ चार दिवसांत ३० गावांमधील शेतकऱ्यांशी शास्त्रज्ञांनी थेट संवाद साधला आहे.
‘विद्यापीठातील संशोधन शेतकऱ्यांच्या दारी’ या नावीन्यपूर्ण संकल्पनेवर आधारित अभियानात कृषी व पशुपालनविषयक तज्ज्ञ शेतकरी, पशुपालक आणि महिला बचत गटांशी थेट संवाद साधत आहेत. आधुनिक तंत्रज्ञानाच्या मदतीने शाश्वत शेती व दुग्ध व्यवसायाचे प्रत्यक्ष मार्गदर्शन शेतकऱ्यांच्या बांधावर जाऊन दिले जात आहे. या अभियानात नैसर्गिक शेती, मत्स्यपालन, शेळीपालन, कुक्कुटपालन, लसीकरण, खाद्य व आरोग्य व्यवस्थापन, म्हशींच्या पावसाळी हंगामातील देखभाल यावर भर देण्यात येत आहे. या अभियानादरम्यान कल्याण, भिवंडी, शहापूर व मुरबाड तालुक्यातील पोई, दाहगाव, कसाने, ताकीपाथर, मुरबाड, नांदगाव आदी ३० गावांना तज्ज्ञांनी भेटी दिल्या. प्रत्येक ठिकाणी ग्रामपंचायत कार्यालयात व गुगल फॉर्मद्वारे शेतकऱ्यांची माहिती नोंदवण्यात आली. तसेच शेतकऱ्यांना आत्मा, कृषी विभाग व आयसीएआरच्या शास्त्रज्ञांनी पूर्वखरीप नियोजन, सुधारित पीक लागवड, बीज प्रक्रिया, आधुनिक कृषी यंत्रणा, बीज उगम क्षमता, वेळेवर पेरणी व कीड नियंत्रणावर मार्गदर्शन करण्यात आले.
----------------------------------
‘एक जिल्हा-एक अधिकारी’ योजना
ठाणे जिल्ह्यापुरते मर्यादित नसून, माफसू संपूर्ण राज्यभरात विविध जिल्ह्यांमध्ये हे अभियान राबवत आहे. मुंबई पशुवैद्यकीय महाविद्यालयातर्फे कोकण विभागासह नंदुरबार, नाशिक, धुळे जिल्ह्यांसाठी ‘एक जिल्हा-एक अधिकारी’ योजना राबवण्यात येत असून, विद्यापीठाच्या संशोधनाचा प्रसार थेट शेतकऱ्यांच्या बांधापर्यंत आणि पशुपालकांच्या गोठ्यापर्यंत पोहोचवण्याचे उद्दिष्ट आहे. या अभियानातून रासायनिक खतांचा अतिरेक टाळून सेंद्रिय शेतीला प्रोत्साहन देण्याचे आवाहनही करण्यात आले. तसेच सेंद्रिय शेतीसाठी पशुधनाचे महत्त्व अधोरेखित करण्यात आले आहे.