रुग्णालयाबाहेर बेकायदा पार्किंगमुळे रुग्णांची वाट खडतर

रुग्णालयाबाहेर बेकायदा पार्किंगमुळे रुग्णांची वाट खडतर
वाशी, ता. १० (बातमीदार) ः नवी मुंबई महापालिकेच्या वाशी येथील सार्वजनिक रुग्णालयाच्या प्रवेशद्वारासमोरील रस्त्याच्या दुतर्फा बेकायदा वाहने पार्क केली जात आहेत. यामुळे रुग्णांसह नातेवाइकांना वाहतूक कोंडीचा सामना करावा लागत आहे. शिवाय पादचाऱ्यांचीदेखील गैरसोय होत असल्याने त्‍यावर कारवाई करण्यात यावी, अशी मागणी करण्यात येत आहे.
नवी मुंबई महापालिकेच्या वाशी येथील सार्वजनिक रुग्णालयाच्या प्रवेशद्वारासमोरील रस्त्याच्या दुतर्फा बेकायदा वाहने पार्क केली जात आहेत. तसेच प्रवेशद्वारासमोर असलेल्या रिक्षा स्टँडमुळे या भागात वाहतूककोंडीची समस्या निर्माण होत आहे. प्रवेशद्वाराच्या शेजारील पदपथांवर दुचाकी पार्क केल्या जात आहेत. त्यामुळे रुग्णांना रस्त्यावरून ये-जा करावी लागत असून, अपघाताची शक्यता निर्माण झाली आहे. ऐरोली येथील रुग्णालयाच्या बाहेरदेखील नो पार्किंगच्या ठिकाणी वाहने पार्क करण्यात येत आहेत. नेरूळमधील डॉ. डी. वाय. पाटील रुग्णालयाच्या प्रवेशद्वारासमोरील रस्त्याच्या दुतर्फाही मोठ्या प्रमाणात वाहने पार्किंग केली जातात, तसेच पदपथांवर दुचाकीही पार्किंग केल्या जात असल्याने विविध उपचारांसाठी रुग्णालयात ये-जा करणाऱ्या रुग्णांची गैरसोय होत आहे.