जुईनगरमधील पदपथ खचला

जुईनगरमधील पदपथ खचला
जुईनगर, ता. ५ (बातमीदार) : जुईनगर रेल्वे स्थानकाकडे जाणाऱ्या मुख्य रस्त्यावरील पदपथ खचल्याने नागरिकांना जीव मुठीत घेऊन प्रवास करावा लागत आहे. गेल्या काही दिवसांपासून पालिका परिसरातील अनेक पदपथांच्या दुरुस्तीची कामे सुरू आहेत. काही ठिकाणी तर पुरेशी गरज नसतानादेखील पदपथांंची कामे केली जात आहेत. दरम्यान, ज्या पदपथावरून प्रतिदिन हजारो नागरिक ये-जा करतात, त्याकडे मात्र पालिका प्रशासनाकडून दुर्लक्ष केले जात आहे. जुईनगर रेल्वे स्थानकाकडे जाणारा हा एकमेव मार्ग असून, यावर दररोज हजारो स्‍थानिक ये-जा करीत असतात. दरम्यान, हा पदपथ खचल्याने परिणामी वाहनांची वर्दळ असलेल्या रस्त्याचा वापर नागरिकांना करावा लागत आहे. या ठिकाणी वळणाचा रस्ता असल्याने ज्येष्ठ नागरिकांना वाहनांच्या वेगाचा अंदाज येत नसल्याने अनेक वेळा अपघाताच्‍या घटना घडल्या आहेत. सध्या पावसाळ्याचे दिवस असल्याने भविष्यात पदपथ कोसळून अपघात होण्याची शक्यता वर्तविली जात आहे. पदपथाला नाला लागून असल्याने भूस्‍खलन झाल्यास अखंड पदपथ वाहून जाण्याची भीतीदेखील व्यक्त केली जात आहे. त्‍यामुळे पदपथाची दुरुस्‍ती करण्यात यावी, अशी मागणी केली जात आहे.